Бундай айёрликни ҳали ҳеч ким синаб кўрмаган бўлса керак. Уйдаги ҳар бир керакли жиҳозлардан унумли фойдаланиш сирларини билиб олиш зарар қилмайди.
Янги пойабзални кенгайтириш мумкин
Ҳар қандай янги пойабзал оёқни уриши табиий. Бунинг учун қалин пайпоқлар устидан оёқ кийим кийилади. Сўнгра қуритгич ёрдамида пойабзалнинг ҳар томони 1-2 дақиқа давомида қиздирилади. Пойабзал тўлиқ совимагунича ечилмайди, шунда у оёқ ўлчамига мослашади.
Стикерлардан қолган елимни тозалаш мумкин
Агар мебель ёки идишлардан махсус стикерлар олиб ташланса, унда елимнинг изи қолади. Ҳаводаги чанг натижасида елим изи хунук кўринишга келиб қолади. Уларни бутунлай тозалаш учун соч қуритгич ёрдамида елим қолдиғи қиздирилади. Юқори ҳароратда қизиган елимни оддий совунли сув ёки латта ёрдамида артиб ташлаш мумкин.
Сув доғларини йўқотиш мумкин
Ювилган шиша идишлар мебелда из қолдирса, албатта, соч қуритгич ёрдамга келади. Унинг аввал совуқ, кейин илиқ ҳаво пуркаш даражаси ёқилади. Намлик юзадан йўқ бўлгунча ҳаво пуркалади.
Машинанинг олд қисмидаги эзилган жойни созлаш мумкин
Бунга ишониш қийин, аммо машинанинг эзилиб қолган жойларини соч қуритгич ёрдамида профессионал таъмирлашсиз амалга ошириш мумкин. Албатта, бунинг учун кўп вақт ҳамда куч керак, лекин натижа шунга яраша.
Кўзойнак бандини қисқартириш мумкин
Кўзойнаклар доимо бурунга тушиб қолишининг сабаби нимада? Бунга бандларнинг узунлиги айбдор. Кўзойнак гардиши пластик материалдан ясалган бўлса, уни қуритгич ёрдамида қиздириб, бармоқлар билан керакли ўлчамга келтириш мумкин.
Овқатни иситиш мумкин
Бу маслаҳат тез-тез саёҳатга чиқадиганлар учун қўл келади. Агар овқатни иситиш керак бўлса, ошхона ёки микротўлқинли печ топишнинг имкони бўлмаса, соч қуритгич ёрдамида уларни иситиш мумкин.
Мум изларидан халос бўлиш мумкин
Соч қуритгич ёрдамида мебелдан мум изларини осонгина олиб ташлаш мумкин. Бунинг учун мум изига иссиқ ҳаво оқими юборилади ва нам латта билан артилади.
Кўмирни ёқиш мумкин
Кабоб пиширишга тайёргарлик бошландими? Бу ишда ҳақиқий профессионалларнинг лайфхаки ёрдамга келади. Кўмир ёнганидан сўнг соч қуритгич ёрдамида ҳаво юбориш лозим. Бу оловни ҳар томонлама тенг тарқалишига ёрдам беради. Кабоб эса меъёрида пишади.
Торт безатишда фойдаланиш мумкин
Торт юзасида бир хилда ёйилган глазур ҳаммага таниш бўлса керак. У тортнинг кўринишини янада бойитади. Агар бу соҳада тажриба кам бўлса, малакали ошпазлар томонидан фойдаланиладиган лайфхак тавсия этилади. Торт устига қуйилган глазурга соч қуритгичда ҳаво пуркалади. Ҳаво оқими туфайли глазур суюқлиги бир текисда юза бўйлаб тарқайди. Натижада у ойнадек кўринишга эга бўлади.
Музлатилган маҳсулотларни эритиш мумкин
Муз бўлагига айланиб қолган маҳсулотларни фақат биттасини ишлатишда соч қуритгич самарали ёрдам беради. Иссиқ ҳаво пуркалгандан сўнг уларни ажратиб олиш осон.
Ёпишиб қолган сақични олиш мумкин
Агар сақич сочга ёпишиб қолган бўлса, уни яхшилаб ёйиш лозим. Дарров қўлга қайчи эмас, балки соч қуритгични олиш керак. Иссиқ ҳаво ёрдамида сақич эритилиб, майда тишли тароқ билан соч яхшилаб таралади ва муаммо бартараф этилади.
Киприкларни қайириш мумкин
Киприк қайрилтирувчи воситадан фойдаланадиганлар учун ажойиб лайфхак. Соч қуритгич ёрдамида унинг қисқичлари қизитилиб, сўнг ишлатилса, киприклар кун давомида ўз шаклини йўқотмайди.
Ширинликларни қолипдан осонгина чиқариш мумкин
Агар бисквитни қолипдан чиқариш муаммо туғдираётган бўлса, қолипнинг ташқи томонидан соч қуритгич ёрдамида қиздириш керак. Ушбу услуб ширинлик тайёрланадиган фолга ёки пергамент қоғозлари учун ҳам фойдали.
Чанг билан курашиш мумкин
Айрим жойлардаги чангларни латта ёки махсус восита ёрдамида кетказишнинг иложи бўлмаса, унда соч қуритгичда бунинг имкони бор. Масалан, компьютер клавиатуралари орасидаги чангни соч қуритгич ёрдамида ҳафтада икки маротаба тозалаш мумкин. Шунингдек, лампа қопқоғи ёки китобларни шу йўл билан озода сақлаш тавсия этилади.
Изоҳ (0)