Агар ошхонангиздаги нон ҳидланган ва моғорлашни бошламаган, шунчаки қотиб қолган бўлса, унда ташлаб юборишга шошилманг. Тавсияга биноан юмшатиб кўринг ёки қуйидаги рецептлардан фойдаланинг.
Қотиб қолган нонни сув парида ушлаш орқали уни юмшатиш мумкин. Нонни сувлаб, уни нам сочиқ ёки зарли қандолат қоғозига ўраб печга 5 дақиқага қўйинг. Бу усул ҳам яхши натижа беради. Бундан ташқари суви қочган нон билан бошқа таомлар ҳам тайёрлаш мумкин.
Риболлита
Италиядаги Тоскана вилоятида севиб истеъмол қилинадиган мазкур шўрва дуккакли маҳсулотлар, карам, сабзи, пиёз, помидор ва гўшт қўшиб тайёрланади. Қотган нон эса таомнинг устига солиниб, қирғичдан чиқарилган пишлоқ билан бирга қўшиб дастурхонга тортилади.
Тез тайёр бўладиган пицца
Хамир тайёрлашга вақт ва хоҳишингиз бўлмаса, қотган нондан тез тайёрланадиган усулдан фойдаланинг. Нон бўлакларини териб чиқиб, томат соуси суртинг. Унинг устидан дудланган гўшт ёки колбаса, қўзиқорин помидор ва кўкат қўйинг. Қирғичдан чиқарилган пишлоқ билан безаб, 15 дақиқа 180 даража қизиган печда пишириб олинг.
Стратра
Америка ошхонасига мансуб ушбу таом «запеканка» ва омлетни эсга солади. Уни тайёрлаш учун қотган нон, товуқ гўшти, пишлоқ, пиёз, тухум, қаймоқ ва сариёғ керак бўлади. Нон ва гўштни кубик шаклида кесинг. Пиёзни сариёғда қовуриб олинг. Тухумга қаймоқ ва туз қўшиб аралаштиринг. Ҳамма маҳсулотларни печда пиширишга мўлжалланган идишга солинг ва устидан қаймоқли аралашмани солинг. Таомни эрталабгача музлаткичда қолдиринг. Тонгда 160 даража қизиган печда 50 дақиқа давомида пишириб олинг.
Нонли соус
Буюк Британия ошхонасидан келиб чиққан мазкур рецепт ёғ ва гўштли таомлар учун айни муддао. Қозончага сув, лавр япроғи, сабзи, сут, қаймоқ ва майда тўғралган пиёз солиб, 100 даража оловда 10 дақиқа қайнатинг. Кейин эса оловни ўчириб совутинг ва элакдан ўтказинг. Нон, туз, мурч ва сариёғ қўшиб аралаштиринг.
Пирог учун «начинка»
Қуриган нон талқонини массаси суюқроқ бўлиб қолган пирогнинг гўшт-балиқли ҳамда ширин «начинкаси»га қўшса бўлади. Аралашмага қўшилган нон ортиқча намликни камайтириб, унинг қуюқ бўлишини таъминлайди.
Тухумли нонушта
Қуриган нон бўлагини товада озгина сариёғ солиб қовуринг ва устидан тухум чақинг. Хоҳишга қараб помидор, кўк пиёз ва бошқа кўкатлардан фойдаланинг.
Ширин «запеканка»
Қотган нондан яна десертга асос сифатида ҳам фойдаланиш, ундан сабзили «запеканка» пишириш мумкин. Бунинг учун сутга нон солиб ивитиб қўйинг. Кейин қирғичдан чиқарилган сабзи билан аралаштиринг. Шакар ва тухум қўшинг. Яхлит масса бўлгунича аралаштиринг ва печда пишириб олинг. Хоҳишга қараб олма ва қуритилган мевалар ҳам қўшишингиз мумкин.
Изоҳ (0)