Коронавирус инфекцияси билан касалланганда ўпка доим шикастланадими? Коронавирусга қарши курашиш штаби аъзоси Барно Абдусаматова АОКА залида ташкил этилган брифингда ушбу саволга изоҳ бериб ўтди.
Мутахассис коронавирус инфекцияси турли шаклларда ўтиши ва доим ҳам ўпкага зарар етказмаслиги, касаллик кўп ҳолларда умуман симптомларсиз кечиши, яъни тест натижаси мусбат бўлса-да, киши ҳеч қандай аломатларни сезмаслиги ва бундай вирус ташувчиси текширилганда организмда ҳеч қандай ўзгариш аниқланмаслигини билдирган.
Симптомлар мавжудлигида касалликнинг қуйидаги шакллари ажратиб кўрсатилади:
- юқори нафас йўллари шикастланиши билан (ринит, фарингит);
- қуйи нафас йўллари шикастланиши билан (пневмония).
Эслатиб ўтамиз, аввалроқ Санитария-эпидемиология назорати давлат инспекцияси бош инспектори Нурмат Отабеков коронавирус асоратлари ҳақида маълумот берган. Унга кўра, инфекциянинг оғир шакли билан касалланган беморларда тромбоэмболия, тромбоз, ўпка артерияси тромбоэмболияси ёки ўткир коронар етишмовчилик каби ўзгаришлар натижасида баъзи беморларда ўпка ҳаётий сиғимининг 20-30 фоизга камайиши, алвеолалар деворларида бириктирувчи тўқиманинг юзага келиши туфайли касалликдан сўнг ўпка фибрози кузатилиши мумкинлиги, бу эса ҳансираш, сурункали кислород етишмовчилигига олиб келишини айтган. Бундан ташқари юрак-қон томир тизимида, буйракларда ва асаб тизимида ҳам патологик ўзгаришлар юзага келиши
мумкин.
Изоҳ (0)