Коронавирусга қарши курашда ёрдам берувчи германиялик мутахассислар Ўзбекистонга келгани хабар берилган эди. Соғлиқни сақлаш вазири Алишер Шодмонов 22 август куни улар билан ўзаро мулоқот ўтказди.
Вазирлик матбуот хизмати хабарига кўра, унда Германиянинг Роберт Кох институти, Жаҳон соғлиқни сақлаш ташкилотининг Европа минтақавий бюроси ва Дюссельдорф университети ҳамда Франкфурт Майн университети клиникаларидан келган мутахассислар иштирок этди.
Мулоқотда Ўзбекистонда пандемиянинг таъсирини имкон қадар камайтириш, касаллик тарқалишининг олдини олиш ва беморларни даволашда немис мутахассислари ва маҳаллий шифокорлар ўртасида ҳамкорлик қилиш масалалари муҳокама қилинди.
Европалик мутахасассислар гуруҳи шу йилнинг 28 августига қадар мамлакатда бўлиб, пойтахт, Тошкент, Самарқанд, Бухоро вилоятларидаги шифохоналарда коронавирусга чалинган беморларни даволаш жараёнларида бевосита иштирок этади.
Ўзбекистонга шу вақтгача коронавирусга қарши курашда ёрдам бериш учун 15 нафар хитойлик шифокор ва тиббиёт мутахассисидан иборат гуруҳ, таркибида анестезиолог, реаниматолог, юқумли касалликлар бўйича мутахассис, эпидемиолог, терапевт ва кардиолог бор 40 нафар россиялик шифокор келган бўлса, март ойининг охиридан бошлаб Ўзбекистонда кореялик профессор — эпидемиолог Цой Чже Ук, яна бир кореялик анестезиолог-реаниматолог, бир қанча туркиялик мутахассислар, Германиянинг етакчи тиббиёт мутахассисларидан бўлмиш профессор Вернер Бер фаолият юритган. Шунингдек, Ўзбекистонга Хитойдан 10 нафар тиббиёт мутахассислари келиши кутилаётгани ҳақида хабар берилганди.
Мавзуга доир: Соғлиқни сақлаш вазири Алишер Шодмонов ишга қайтди
Изоҳ (0)