Аллергияси бор беморлар коронавирус юқтирмаганлигини аниқлашда нималарга эътибор қилиши лозимлиги айтилди

Коронавирусга қарши курашиш штаби аъзоси Барно Абдусаматова аллергияси бор беморлар қайси ҳолатда шифокорга мурожаат қилиши лозимлигини айтиб ўтди.

Томоғида аллергия ва аллергик йўталга эга беморлар йўталдан ташқари тана ҳарорати кўтарилиши, мушакларда оғриқ, нафас қисиши, таъм ва ҳид билишнинг йўқолиши каби аломатларни сезган тақдирда коронавирусга гумон қилиниши билдирилди.

«Аллергик йўтал узоқроқ давом этади ва мавсумий бўлади. Агар йўталингиз юқоридаги белгилар билан келадиган бўлса, ҳудудий поликлиникага мурожаат қилинг. Чунки аллергия фонида келадиган коронавирус касаллиги нафас сиқиши каби аломатларга олиб келиши мумкин», — дейди Абдусаматова.

Мутахассиснинг сўзларига кўра, нафас сиқиши ҳаво етишмаслигини ҳис қилиш, нафас олиш тезлиги, хотиржамликда дақиқасига 22 та нафас олиш белгиларига эга.

Нафас частотасини хотиржам ҳолатда ўлчаш учун қуйидагиларни бажариш зарур:

• Секундомер ёки қўл соатини олинг ёки уяли телефонингизда секундомерни ёқинг;
• агар бу вақтгача ҳаракатда бўлган бўлсангиз, 5 дақиқа дам олинг;
• ўтирган ёки ётган ҳолда қўлларингизни кўксингизга қўйинг;
• неча марта нафас олишингизни сананг;
• 1 дақиқадан сўнг санашни тўхтатинг. Катта кишиларда нормал нафас олиш частотаси 12-18 та бўлади.

Агар кўрсаткичлар 22 тадан кўп бўлса шифокорга мурожаат қилинг, бу нафас олишда муаммо борлигини кўрсатади.

Коронавирусга қарши курашиш штаби аъзоси Барно Абдусаматова