Ижтимоий тармоқларда ўзини Maллабек ўғли Жамолиддин деб таништирган шахснинг пайғамбарликка даъво қилгани тасвирланган видео тарқалди. Унда ушбу шахс Аллоҳнинг вакили қилиб юборилгани, ҳамма учун ягона дин «Имон йўли дастури» динини тарғиб қилиш, бунга 35 йил тайёргарлик кўргани, муайян ибодатлар дастури борлигини айтган.
Ўзбекистон мусулмонлари идораси Фатво ҳайъати бунга муносабат билдириб, бу каби ҳолат биринчиси ва охиргиси ҳам эмаслиги, аҳён-аҳёнда учраб туриши табиий ҳол эканлиги таъкидланди.
«Ҳурматли блогер ҳамда фаол интернет фойдаланувчиларига дин масаласидаги ҳар қандай ноодатий ҳолатни оммага кўрсатиш ҳамиша ҳам тўғри бўлавермаслигини таъкидламоқчимиз. Чунки бу одамларнинг эътиқоди билан боғлиқ масала ҳисобланади.
Шундан келиб чиқиб, Ўзбекистон мусулмонлари идораси бундай хатти-ҳаракатни қатъий қоралашини, илм-у маърифат ривожланган бугунги даврда одамларнинг вақтларини олиб, бу каби асоссиз лавҳаларни тарқатиш ҳеч қандай мантиққа тўғри келмаслигини ҳамда мўмин-мусулмонларимиздан бу каби шахсларнинг сохта даъволарига чалғиб қолмасликларини сўраб қоламиз», — дейилади муносабатда.
Эслатиб ўтамиз, 2020 йилнинг февраль ойида пайғамбарликка даъво қилган бухоролик аёлга бир йил озодликни чеклаш жазоси тайинлангани хабар берилганди. Июль ойида эса Самарқандда ўзини пайғамбар деб чиққан шахснинг видеоси тарқалган, кейинчалик унинг бош мия контузияси касаллиги билан даволангани маълум бўлганди.
Изоҳ (0)