Афсонавий рок-гитарачи ва композитор Эрик Клэптон ўзининг Ferrari 599 GTB машинасини сотувга қўйди. Икки эшикка эга 13 ёшли машина ҳозирга қадар 38 минг километр йўл босган бўлиб, мусиқачи уни 89,9 минг фунтга сотмоқчи. Автомобиль савдоси билан Лондондаги GVE салони шуғулланмоқда, деб хабар беради Motor.
Эрик Клэптон Ferrari моделлари ишқибози эканлиги билан танилган — 75 ёшли блюз-рокернинг гаражидан италян маркасининг ўнлаб моделлари ўрин олган, хусусан, 1960 йиллардаги классик «гран туризмо» ҳам. Бироқ мусиқачи Ferrari 599 GTB билан хайрлашишга қарор қилган, унинг мухлисларида эса «ўз тарихига эга» автомобилни харид қилиш имконияти пайдо бўлди.
2007 йилда ишлаб чиқарилган «Берлинетта»га мунтазам техник хизмат кўрсатилган ва ажойиб ҳолатда сақланган. Кузов ҳамда 20 дюймли ғилдираклар Nero Daytona Black рангига бўялган, интерьери эса ёрқин жигарранг Castoror Light Brown чарми билан қопланган. Клэптонга тегишли Ferrari’нинг ўзига хослиги — сариқ суппортларга эга углерод-керамикали тормозлар, BOSE Hi-Fi аудиотизими, электрон бошқарилувчи ўриндиқлар.
Машина капоти остида қуввати 620 от кучига тенг 5999 сантиметр кубли V12 двигатели ўрин олган бўлиб, у 6 поғонали Ferrari F1 «робот» трансмиссияси ёрдамида бошқарилади.
Ferrari 599 GTB — Эрик Клэптон томонидан сўнгги ойларда сотувга қўйилган иккинчи суперкар ҳисобланади. Яқинда мусиқачи ўзининг Lamborghini Gallardo Superleggera’сини 125 минг фунт стерлингга сотган эди.
Аввалроқ Голливуд актёри Сильвестр Сталлоне ўзининг шахсий Cadillac Escalade йўлтанламасини 350 минг доллар эвазига сотувга қўйгани тўғрисида хабар берилганди.
Изоҳ (0)