Республика махсус комиссиясининг 12 август куни эълон қилинган қарорига кўра, Ўзбекистонда ҳудудлараро транспорт қатновига, шунингдек, жамоат транспорти, шаҳар (туман) ва шаҳар атрофи йўналишлари бўйича автобуслар қатновига рухсат берилди. Айни вақтда, ҳайдовчи, чиптачи ва йўловчилар амал қилиши лозим бўлган қоидалар ўрнатилди.
Жумладан, ҳайдовчи ва чиптачи доим тиббий ниқоб ва қўлқопда бўлиши керак, агар тана ҳарорати 37 даража ёки ундан юқори бўлса, ишга қўйилмайди; йўловчилар ҳам тиббий ниқобда бўлиши шарт ва салонда ижтимоий масофа сақлаши керак; транспорт воситалари сўнгги бекатларда тўлиқ (ҳар бир ўриндиқ) дезинфекциядан ўтказилиши зарур.
Махсус комиссия қарорида жамоат транспорти фаолиятини қайта тиклаш бўйича аниқ сана кўрсатилганди — 17 август. Шунингдек, метрополитенга ҳам ҳозирча рухсат берилмаслиги таъкидланган эди. Бироқ икки истисно бўлди — Тошкентда жамоат транспортига 15 августдан рухсат берилди, метро ҳам беш ойлик танаффусдан сўнг худди шу куни ишга тушди.
«Тошшаҳартрансхизмат» компанияси бу вазиятни изоҳларкан, ушбу қарор «кенг жамоатчилик талабидан келиб чиқиб» қабул қилинганини маълум қилди. Ўзбекистоннинг бошқа ҳудудларида жамоат транспорти ҳаракати Махсус комиссия қарорида кўрсатилган сана — 17 августдан қайта тиклана бошлади. Айрим ўзига хосликлар билан.Самарқандда автобус салонида йўловчилар сони 25 нафардан ошмаслиги шарт
Самарқанд вилояти Транспорт бошқармаси ходимлари 17 август куни эрта тонгдан автокорхоналарда бўлиб, йўналишга чиқувчи ҳар бир автобусни кўздан кечирган. Кўрикда асосий эътибор ҳайдовчиларнинг қўлқоп ва ниқоб билан таъминланганлигига, қайтим учун пулнинг етарлилигига, Tezcard валидаторлари ўрнатилганига қаратилган.
Қайд этишларича, бошқарма инспекторлари автобус салонида йўловчилар сони 25 нафардан ошмаслигини кун давомида назорат қилиб бормоқда (қайд этиш жоиз, Республика махсус комиссиясининг 12 августдаги ахборотида автобуслардаги йўловчилар сони бўйича аниқ бир чеклов ўрнатилгани кўрсатилмаган эди).
Вилоят Транспорт бошқармасининг «Zarnews» нашрида эълон қилинган мурожаатида йўловчилардан автобус салонида ижтимоий масофани сақлаш, «агар автобус салонида йўловчи сони меъёрдан ортиқ бўлса, яхшиси навбатдагисини кутиш», автобусдан тушгач, антисептиклардан фойдаланиш сўралган.
Қорақалпоғистонда беш ойлик карантиндан сўнг Damas’лар қатновига рухсат берилди
Қорақалпоғистонда 17 августдан бошлаб нафақат автобусларда, балки Damas, «Газел» каби микроавтобусларда ҳам йўловчи ташишга рухсат берилган (худди Тошкентда йўналишли таксилар — «маршрутка»лар қатновига рухсат берилгани каби). Бу ҳақда, Қорақалпоғистон Транспорт вазирлигига таяниб, ЎзА хабар бермоқда.
Damas’лар масаласида эътиборга молик бир жиҳат бор — микроавтобусларнинг олдинги (ҳайдовчининг ёнидаги) ўриндиғига йўловчи ўтириши мумкин эмас. Қолган талаблар автобусларники билан бир хил — салон дизенфексия қилиниши, ҳайдовчи ниқоб ва қўлқопда бўлиши, ниқобсиз йўловчилар транспортга чиқарилмаслиги керак.
Мавзуга доир: Тадқиқотчилар коронавируснинг авж олиши ва жамоат транспорти ҳаракати ўртасида ҳеч қандай боғлиқлик топмади
Бироқ Damas’ларга ҳаммаёқда ҳам рухсат теккани йўқ. Ҳозирча
Damas’да йўловчи ташиш билан шуғулланувчи ҳайдовчиларнинг: «15 августдан йўналишли такси фаолиятига ҳам рухсат бериладими?» деган маънодаги кўплаб мурожаатларига жавоб бераркан, Қашқадарё вилояти Транспорт бошқармаси бу каби саволлар Республика махсус комиссияси қарорини «нотўғри тушуниш ва нотўғри талқин қилишдан келиб чиқаётгани»ни маълум қилган эди.«Комиссиянинг навбатдаги ахборотида йўловчи ташишда Damas’лар қатновига рухсат бериш масаласи умуман тилга олинмади. Бу эса ушбу турдаги транспорт воситаларининг ишлашига қўйилган тақиқ ҳали расман олиб ташланмаганини англатади. Фақат жамоат транспорти — автобусларга рухсат этилди... Ҳайдовчилардан мазкур чекловга қатъий амал қилишни сўраймиз. Акс ҳолда бундай хатти-ҳаракат жавобгарликка сабаб бўлади», — дейилади бошқарма ахборотида.
Наманган вилоятида ҳам Damas русумли машиналарда йўловчи ташишга рухсат берилмаган — бу коронавирусга қарши кураш бўйича вилоят комиссиясининг карантин чораларини юмшатиш бўйича баёнида ҳам алоҳида кўрсатиб ўтилган. Шунингдек, Андижон, Фарғона, Хоразм, Самарқанд вилоятларида ҳам Damas’ларда йўловчи ташишга нисбатан тақиқ ҳали бекор қилинмагани билдирилди. Қайд этишларича, Самарқандда ҳайдовчилар тақиқни бекор қилишни сўраб вилоят комиссиясига мурожаат қилган.
Айни вақтда, расмий тақиққа қарамай, Андижон, Фарғона, Самарқанд вилоятларида Damas’да йўловчи ташилмоқда. «Рухсат берилмаган бўлса-да, Damas’лар қатнаб юрибди», — дейди «Дарё»нинг Самарқанд ва Андижондаги мухбирлари. Фарғонадаги мухбирнинг таъкидлашича, «Damas’лар карантин кучайтирилган даврда ҳам бемалол одам ташиб юрди, ҳатто ўша кунларда вилоятдан Тошкентга одам ташиш ҳам тўхтамади».
Вирус, катта эҳтимол билан, йўналишсиз таксида ҳам, йўналишли таксида ҳам, автобус ва метрода ҳам, Тошкент ва Қаршида ҳам бир хилда юқаверади (аввало, юқмасин). Коронавирусга чалинган беморлар энг кўп , касалланиш кўрсаткичи ва суръати бўйича ҳали ҳам мамлакатда биринчи бўлиб турган Тошкентда «кенг жамоатчилик талабидан келиб чиқиб» нафақат йўналишли такси, балки метро фаолиятига ҳам рухсат берилган бир вақтда, айрим ҳудудларда, таъбир жоиз бўлса, «жамоат транспорти» вазифасини бажарувчи ягона восита — Damas’ларга рухсат бериш ҳайдовчиларнинг тирикчилиги учун ҳам, узоғи яқин бўладиган йўловчилар учун ҳам фойдадан холи бўлмас.
Изоҳ (0)