Камераси экран остидан ўрин олган биринчи смартфоннинг техник тавсифлари ошкор бўлди

ZTE компанияси тез орада ўзининг фронтал камераси дисплей остига яширинган А20 5G номли янги смартфонини тақдим этади. Хитойнинг TENАА регулятори сайтида девайснинг илк техник тавсифи ва суратлари пайдо бўлди, деб ёзади GSMArena.

А20 5G моделига Full HD+ сифатга эга 6,92 дюймли OLED экран ўрнатилган. Афтидан қурилма Snapdragon 765G процессори базасида ишлайди. Смартфон уч турдаги тезкор (6, 8 ва 12 гигабайт) ҳамда ички (64, 128 ва 256 гигабайт) хотирага эга вариантларда тақдим этилади, шунингдек, уларга 1 терабайт microSD картасини ҳам ўрнатиш мумкин. Операцион тизим сифатида Android 10’дан фойдаланилади. Қурилма автономлигига сиғими 4120 мА/соатли аккумулятор жавоб беради.

32 мегапикселли фронтал камера экран остига жойлаштирилган бўлиб, унинг ёнига бармоқ изи сканери ҳам «яширинган». Смартфон орқа томонидан эса асосий камераси 64 Мп, кенг бурчакли —8 Мп ҳамда иккиталик сенсорли — 2 Мп бўлган квадрокамера ўрин олган.

Қурилма қачон тақдим этилиши ва нархи ҳақида ҳозирча маълумотлар йўқ.

Аввалроқ Xiaomi айланувчи камерага эга смартфон устида иш бошлагани тўғрисида хабар берилганди.