Caviar компанияси Илон Маск ва унинг SpaceX лойиҳасига бағишланган ноёб iPhone 12 Prо Limited Edition смартфонини тақдим этди, деб хабар беради IXBT.
iPhone 12 моделлари сентябрь ойида тақдим этилиши лозимлигига қарамай, унинг ташқи кўриниши аллақачон маълум бўлган. Caviar’нинг Россия бренди эксклюзив iPhone версияларини тақдим этиш билан танилган, шу сабабли компания тез-тез стандарт версиялар эълон қилингунига қадар ўз моделлари билан бўлишиб келади.
iPhone 12 Prо Limited Edition’нинг махсус версиясининг орқа қисмига Musk be on Mars ёзуви туширилган бўлиб, унинг сал пастроғидан Илон Рив Маск исми ҳамда бизнесменнинг имзоси ўрин олган. Қурилма орқа тарафига SpaceX Dragon ракетасининг рельеф тасвири туширилган.
iPhone 12 Pro’нинг концептуал смартфонининг ўзига хослиги мавжуд: Caviar орқа панелга ҳақиқий Dragon космик кемасининг кичик бир парчасини қўшган.
iPhone 12 Pro Limited Edition — Musk be on Mars смартфони титандан ишланган бўлиб, тасвирлар металлга лазер техникаси ёрдамида туширилган. Шунингдек, ҳар бир қурилмага уникал рақам берилган. Caviar ўзининг ушбу моделини 19 нусхада яратади.
iPhone 12 Prо Limited Edition — Musk be on Mars нархи 4990 долларни, iPhone 12 Pro Max эса 5450 долларни ташкил этади.
Caviar компанияси бунга қадар смартфон-танк — iPhone Т-34’ни, Россия президенти Владимир Путиннинг портрети ва имзоси акс эттирилган iPhone 6s’ни, АҚШ президенти Дональд Трамп шарафига тилла iPhone 7 каби ноёб моделларни тақдим этган.
Изоҳ (0)