Фарғонада нархи 290 доллар бўлган кислород контцентраторлари ишлаб чиқарилади

Фарғона вилоятида кислород контцентраторларини ишлаб чиқариш йўлга қўйилади, дея хабар бермоқда «Дарё» мухбири.

Маълум қилинишича, «Қўқон» эркин иқтисодий зонасида жойлашган Great Kokand МЧЖ томонидан тиббий жиҳозлар ишлаб чиқаришни кўзда тутувчи 300 минг долларлик янги лойиҳа амалга оширилмоқда.

Таъкидланишича, корхонада йилига 30 минг дона кислород контцентратори ишлаб чиқарилиб, ички ва хориж бозорларига етказиб берилади.

Дастлабки ҳисоб-китобларга кўра, Қўқонда ишлаб чиқарилган бир дона кислород контцентраторининг нархи 290 долларни ташкил этади.

Аввалроқ Фарғонага Хитойдан донаси 4 миллион сўм бўлган 500 дона кислород контцентратори олиб келингани ҳақида хабар берилганди.

Эслатиб ўтамиз, Бухоро вилоят соғлиқни сақлаш бошқармаси коронавирус билан оғриган беморларга ёрдам бериш мақсадида Dynmed компаниясининг ҳар бири 12 миллион сўм турувчи 50 дона тиббиёт концентраторини сотиб олгани ҳақида хабар берилганди.

Telegram’даги «Bakiroo» канали юритувчиси Отабек Бакиров Dynmed компаниясининг кислород концентраторлари Alibaba’да 320 доллардан таклиф этилаётганини, агар 100 тадан ортиқ олинса, 220 доллардан сотилаётганини ёзиб қолдирди. Шунингдек, «Troll.uz» каналида ҳам 50 дона концентратор орасидаги фарқ 436 миллион сўм экани танқид қилинган.

Бухоро ҳокими ўринбосари Мирали Ҳамроев мазкур ҳолатни изоҳлар экан, давлат ҳокимияти ва бошқаруви органлари томонидан олиб борилаётган ишларга асоссиз хулоса берилаётганини қоралашини билдириб, блогер айтаётган нархда кислород концентратори бор бўлса, харид қилишга тайёрлигини айтганди. Молия вазирлиги эса Бухородаги кислород концентраторларининг сотиб олинишининг қонунийлигига изоҳ берди.