Ўзбекистонда 17 август соат 17:00 ҳолатига кўра, коронавирус инфекцияси қайд этилганлар сони 35 702 нафарга етди. Бу ҳақда Соғлиқни сақлаш вазирлиги хабар бермоқда.
Коронавирусга чалинганларнинг 60,8 фоизи Тошкент шаҳрига тўғри келмоқда. Пойтахтда 21 723 кишида COVID-19 қайд этилган.
Коронавирус энг кам аниқланган ҳудуд Жиззах вилояти бўлиб турибди. Жиззахда ҳозиргача 147 кишида касаллик қайд этилган. Бу Тошкент шаҳридаги барча ҳолатлардан 147 баравар кам деганидир.
Жиззахда энг кам касаллик аниқланган бўлса-да, ўлим кўрсаткичи бўйича энг юқори натижа айнан шу вилоятга тўғри келмоқда. Жиззахда 147 кишидан 6 нафари ёки 4 фоизи коронавирус қурбони бўлган. Кейинги ўринлардаги Навоий вилоятида беморларнинг 1,2 фоизи (491 кишидан 6 нафари), Қорақалпоғистонда 1,1 фоизи (439 кишидан 5 нафари) вафот этган.
Қолган барча ҳудудларда ўлим кўрсаткичи 1 фоиздан паст. Энг паст кўрсаткич Андижон вилоятига тўғри келмоқда, вилоятдаги 1148 нафар бемордан 2 нафари (0,17 фоизи) касаллик асоратлари оқибатида оламдан ўтган.
Айни пайтда коронавирусга чалинган 35 702 кишидан 31 384 нафари тузалиб, соғайиш кўрсаткичи 87 фоизни ташкил этмоқда. Ҳозирда Ўзбекистонда 4082 нафар бемор даволанишни давом эттирмоқда.
Изоҳ (0)