Навоий вилоятининг Қизилтепа туманидаги 12-мактабда ўқитувчиларга устама ҳақ тўлашда қонунбузарликка йўл қўйилгани маълум бўлди. Бу ҳақда «Дарё»га Навоий вилоят ҳокимлиги ахборот хизмати раҳбари Дилшод Мамаражабов маълум қилди.
Таъкидланишича, Қизилтепа туман адлия бўлими томонидан туман халқ таълими тизимида мониторинг ўтказилган. Унда ташкилот томонидан ходимларга устама пуллари ортиқча тўланиб, қонунбузарликка йўл қўйилгани аниқланган.
«Қонунчиликка кўра, ташкилот томонидан ходимга қўшиб ёзилган пул қайтариб олинмайди. Аммо Қизилтепа туман халқ таълими тизимида ана шу тартибга амал қилинмаган», — дейди Қизилтепа туман адлия бўлими бош маслаҳатчиси Сардор Искандаров.
Маълум қилинишича, Президентнинг «Чет тилларни ўрганиш тизимини янада такомиллаштириш чора-тадбирлари тўғрисида»ги қарорига мувофиқ, чет тилидан дарс берадиган ўқитувчиларнинг маошига тариф ставкаси бўйича шаҳар мактаблари учун 15 фоиз, қишлоқ мактаблари учун 30 фоиз устама пули қўшиб берилади. Бироқ тумандаги 12-сонли умумий ўрта таълими мактаби ўқитувчиларига мазкур устама 15 фоиз эмас, 30 фоизлик миқдорда тўлаб берилган.
«Меҳнат кодексининг 279-моддаси (ортиқча тўланган иш ҳақини қайта ундириб олиш шартлари) кўра, иш берувчи томонидан ихтиёрий равишда тўланган, шу жумладан, қонуннинг нотўғри қўлланиши оқибатида тўланган ортиқча иш ҳақи қайта ундирилмаслиги белгиланган. Бунда мазкур таълим муассасасининг шаҳар мактаблари даражасига тенглаштирилганига эътибор берилмаган. Таълим тизимидаги ички аудит текшируви давомида Президент қарорининг нотўғри қўлланилиши натижасида ойлик иш ҳақи ортиқча тўлаб юборилганлиги аниқланди. Мазкур ҳаракат ҳам қонунчиликка зид», — дейди С.Искандаров.
Шунга асосан, Қизилтепа туман адлия бўлими томонидан хатога йўл қўйган шахсларга нисбатан маъмурий ва интизомий жазо чоралари қўлланилган. Мактаб ходимларидан ушлаб қолинган 10 миллионга яқин пул маблағлари қайтарилган.
Изоҳ (0)