Тошкент вилояти Бўка туманида икки ҳамқишлоқ мол боқиш учун яйлов талашиб жанжаллашган ва эркаклардан бири иккинчисига ўроқ билан жароҳат етказган. Бу ҳақда Тергов департаменти хабар берди.
Маълум қилинишича, 2020 йилнинг 6 август куни соат тахминан 18:30 да Бўка тумани «Камолот» фермер хўжалиги дала майдонида 31 ёшли З.Э. қўшниси, 33 ёшли Д.Е. билан қорамолларини боқиш учун яйлов талашган. Натижада келиб чиққан ўзаро жанжал оқибатида З.Э. қўлида бўлган ўткир ўроқнинг тиғ қисми билан Д.Е.нинг чап томон қорин бўшлиғига бир марта санчиб, тан жароҳати етказган.
Натижада Д.Е. тан жароҳатлари билан тиббий муассасага ётқизилган. Ҳодиса жойи тезкор тергов гуруҳи томонидан кўздан кечирилиб, жиноят қуроли сифатида фойдаланилган ўроқ ашёвий далил тариқасида расмийлаштириб олинган.
Мазкур ҳолат юзасидан Бўка тумани ИИБ ҳузуридаги Тергов бўлими томонидан Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилган.
З.Э. жиноят ишида айбланувчи тариқасида жалб этилиб, унга нисбатан қамоққа олиш тарзидаги эҳтиёт чораси қўлланилган. Ҳозирда жиноят иши бўйича тергов ҳаракатлари олиб борилмоқда.
Мавзуга доир:
Изоҳ (0)