Блогер Беҳзод Ҳошимов YouTube’даги «Ҳошимов иқтисодиёти» дастурида Сан-Францискодаги Калифорния университети профессори, вирусолог олим Шароф Тугизов билан COVID-19’нинг келиб чиқиши, тарқалиши ва давоси ҳақида суҳбат уюштирди.
Суҳбат давомида Беҳзод Ҳошимов Ўзбекистонда биноларнинг кириш қисмида хлорли туннеллар қилинаётгани, ЙПХ постларида хлорли сув сепилаётгани ушбу чора коронавирус инфекциясининг тарқалишига қарши курашда самара бериш ёки бермаслиги борасида суҳбатдошига савол берган.
«Хлор вирусни ўлдиради. Лекин одамнинг устига хлор сепишнинг фойдаси йўқ, чунки вирус оғиз ёки бурундан ташқарига чиқади, ташқарига чиққанидан кейин у тарқалиб кетади. Фақат бир метр атрофидаги масофадаги одам билан мулоқот бўлса, вирус юқиш эҳтимоли юқори, икки метрдан кейин юқиш эҳтимоли жуда ҳам кам. 4-5 метрдан кейин юқиш эҳтимоли умуман йўқ.
Кийим-бошнинг устига хлор сепилган қанчалик самарали эканини билмадим. Айниқса, машинанинг устига. Машина шинасининг устига хлор билан ишлов бериш мумкин. Асфальтда юрган вақтингизда асфальтнинг юзасига одамларнинг сўлаги тушган бўлиши, унда катта концентрациядаги вирус бўлиши мумкин. Ўшанда, балки, ёрдам бериши мумкиндир», – дейди узоқ йиллардан бери АҚШда яшаётган вирусолог.
Шунингдек, Шароф Тугизов антивирус, хлорли концентратли ҳимоя воситаси, вирус блокаторларини тақиб юриш ҳақида берилган саволга ҳам жавоб қайтарган.
«Бундай қурилмани ҳали кўрмадим. Лекин унинг фойдаси йўқ. Уни тақиб юрганингиз билан хлор ўзидан ўзи аэрозол бўлмайди. Яна бир марта айтяпман, ниқоб жуда катта аҳамиятга эга», – дейди мутахассис.
Шароф Тугизов суҳбат давомида COVID-19 коронавирус инфекциясига чалинган ва ундан соғайган одамнинг ўпкасида сурункали асоратлар қолиб кетиши мумкинлигини айтди. Олимнинг айтишича, вирус ўпкада фиброз чақиради. Ўпкада бронхларнинг ўрнига фибропластларга ўхшаган бириктирувчи тўқималар пайдо бўлиб, бемор тузалиб кетганидан кейин ҳам ўпканинг ҳажми кичкина бўлиб қолади.«Ўпка яхши ишламагани учун инсон калта нафас оладиган бўлиб қолади. Бу катта муаммони келтириб чиқаради. Қон томирларининг ичида эндотелий ҳужайралар бор, ўшалар яллиғланади. Бу бошқа органлар – юрак, буйракда ҳам муаммолар келтириб чиқаради. Хуллас, асоратлари қолиши мумкин», – дея таъкидлаган вирусолог.
Изоҳ (0)