UzAuto Motors депутат Кушербаевнинг фикрларини популизм ва ҳақиқатни бузиб кўрсатиш деб атади

UzAuto Motors компанияси Монополияга қарши курашиш қўмитасининг компания томонидан «Рақобат тўғрисида»ги қонун талабларига риоя этилиши юзасидан текшируви ҳақидаги депутат Расул Кушербаевнинг ўз Telegram-каналида берган хабарларига изоҳ берди.

Монополияга қарши курашиш қўмитаси 29 июлдаги хабарида қонунбузарлик белгиларини аниқлаганлиги ва тегишли тартибда UzAuto Motors’га нисбатан иш қўзғаганлигини эълон қилган эди.

UzAuto Motors’нинг қайд этишича, бу текширувларга аслида депутатлик сўровлари туртки бўлмаган — текширув бир неча ойдан бери олиб борилмоқда, Монополияга қарши курашиш қўмитаси 29 июль куни нархни шакллантириш масаласини чуқурроқ ўрганишга қарор қилган, худди шу куни депутатлар гуруҳидан сўров келиб тушган.

«Афсуски, либерал-демократик партия аъзосининг бу борадаги фикри ўзгача экан — у томондан нафақат популистик фикр-мулоҳазалар, балки Монополияга қарши курашиш қўмитаси тезисларининг очиқ-ойдин бузилган талқини навбатдаги ахборот порцияси ўлароқ 5 августда Telegram’да эълон қилинди», — дейилади UzAuto Motors баёнотида.

Компаниянинг маълум қилишича, ҳозирда Монополияга қарши курашиш қўмитаси экспертлари томонидан мартдаги нарх ўзгариши, бутловчи қисмлар нархининг узоқ муддатли прогнозининг аниқлиги масаласи ўрганилмоқда ва депутат келтирган маълумотлар ҳали аниқланмаган, масала ҳали кўриб чиқилмоқда.

«Қўмита мутахассислари, шунингдек, реклама харажатлари ва кредитларга хизмат кўрсатиш сарф-харажатларининг нарх шаклланиши жараёнига киритилишининг асосланганлигини ҳам текширмоқда. Бу йўналишда ҳам компания мувофиқлаштирувчи идора билан ҳамкорликда ишламоқда, ўзи ишлаб чиққан ва бир қатор идоралар томонидан тасдиқланган ҳисоб-китоблар тўғрилигини маъқулламоқда. Шубҳасиз, бу борада охирги хулосани Монополияга қарши курашиш идораси айтади», — дейилади компания баёнотида.

Депутат Расул Кушербаев ўз чиқишида «текширув UzAuto Motors’нинг махсус акциялари орқали автомобилларни муддатли тўлов асосида сотиш фақат компания муассислигидаги Autosanoat Invest компанияси орқали амалга оширилгани», «бошқа дилерлар бевосита бундай акция ўтказиш ҳуқуқига эга бўлмагани»ни кўрсатганини таъкидлаган эди. Ушбу фикрлар UzAuto Motors томонидан инкор этилган.

«UzAuto Motors компанияси Autosanoat Invest’нинг муассиси эмас ва ҳеч қачон бундай бўлмаган ҳам — бу компания 100 фоиз ‘Ўзавтосаноатъга тегишли. Бундан ташқари, UzAuto Motors амалда ҳеч қандай акция уюштирмайди — у фақат автомобиллар ишлаб чиқаради, уларни кейин дилерлар ўз автосалонларида сотади. Дилерлар, ўз навбатида, қонунчилик доирасида ва ўз тасаввурларидан келиб чиқиб, исталган акцияни ўтказиши мумкин», — дейилади UzAuto Motors баёнотида.

«Кейинги икки йилда компания ўз фаолиятини очиқлик ва истеъмолчи билан ҳурмат асосидаги мулоқот асосида қурмоқда. Агар компания қаердадир ноҳақ бўлса, ўз хатоси устида ишлашга тайёр. Лекин тегишли хулосани биз бунга ваколатли давлат идорасидан олишни кутамиз», — дея хулоса қилинган UzAuto Motors баёнотида.