Классик автомобиллар савдоси билан шуғулланувчи LBI Limited компанияси 1969 йилда ишлаб чиқарилган Chevrolet Corvette C3 Stingray’ни сотувга қўйди. 51 ёшли спорткар 40 минг долларга баҳоланмоқда, деб хабар беради Motor.
Родстер экстерери Fathom Green тўқ яшил рангда ишланган ва хромланган деталлар билан безатилган: бамперлар, орқани кўришга мўлжалланган ойналар ва олд ойна роми. Автомобиль оригинал ғилдирак дискалари ва шиналари билан тақдим этилмоқда. Салон ҳам заводдан чиққанидан буён деярли ўзгаришга учрамаган.
Сотувчининг маълум қилишича, Stingray’нинг ҳозирги эгаси уни 1998 йилда сотиб олган. Машина харид қилинган вақтида салкам 80 минг километр йўл босган бўлган, ҳозирга келиб эса ушбу кўрсаткич 4000 километрга ошган. Икки эшикли машина яхши ҳолатда сақланган, «подвеска» ва тормоз тизимидаги «ейилган» кўплаб деталлари алмаштирилган.
Chevrolet Corvette C3 Stingray 304 от кучига эга 5,7 литрли V8 мотори ёрдамида ҳаракатга келади. У эса ўз навбатида тўрт поғонали механик узатмалар қутиси ёрдамида бошқарилади. Motor тўлиқ оригиналлигини сақлаб қолган, фақат радиатор янгиланган ва клапанлар қопқоғи бўялган.
Мавзуга доир: Янги Chevrolet Corvette Stingray номини сақлаб қолади
Изоҳ (0)