“Davlat bu zuluklardan kechib maydonni mard, halol, mas’uliyatli raqobatchilarga tezroq bo‘shatib berishi kerak” — Rasul Kusherbayev monopolistlar haqida

Moliya vazirligi Inqirozga qarshi kurashish jamg‘armasining daromad va xarajatlari haqida ma’lumot bergandi. Qonunchilik palatasi deputati Rasul Kusherbayev ushbu jamg‘arma xarajatlarining katta qismi monopoliyalarga ajratilganiga e’tibor qaratdi va bunga o‘z munosabatini bildirdi.

Deputat koronavirusga qarshi kurash tadbirlari uchun mamlakat bo‘yicha 907 milliard, shifoxona va karantin majmualarini qurish va jihozlash uchun jami 684 milliard so‘m ajratilgan bir vaqtda, ssuda tariqasida Uzbekistan Airways’ga 406 milliard, Uzbekistan Airports’ga 101 milliard, “Birinchi rezinotexnika zavodi” MChJga 40 milliard, “Hududiy elektr tarmoqlari”ga 250 milliard, shuningdek, “O‘zbekneftgaz”ga subsidiya hisobida  401 milliard, “Issiqlik eelektr stansiyalari”ga esa 500 milliard, so‘m miqdoridagi mablag‘lar ajratilganini qayd etib, “Bir nechta monopolistga ajratilgan mablag‘ jami koronavirusga qarshi kurash uchun ajratilayotgan mablag‘dan ham ko‘p. Bu insofsizlik emasmi?”, — deb aytdi.

“Iste’molchi sifatida xalqimizga tanlov imkoniyatini bermaydigan hurmatli monopolchilarimizni faoliyatidan odamlarimiz shu kunga qadar rozi bo‘lib kelganda ham alam qilmasdi. Ayting qaysi biridan biz rozimiz: dunyoda neft narxi minus darajaga tushgan vaqtda ham benzin narxini bir ikki haftaga nomiga tushirib, yana qaytarib qo‘ygan ‘o‘yinchi” ‘O‘zbekneftgaz’danmi, bilet narxlari osmon, sifati past Uzbekistan Airways nomli havo yo‘llaridanmi yo joylarda normal chiroq yoqib o‘tirishdan ham mahrum qilayotgan elektr tarmoqlaridanmi?”, — deyiladi deputat munosabatida.

“Mana monopoliyaning oqibati: ular davlat va xalqni tanasidagi zulukdek o‘lguncha so‘rishadi, xalq kulsa ham o‘lsa ham ular doimo yuk, millionlab odamlar bir nechta ‘erkatoy’ni boqishga mahkum bo‘ladi. Shu sabab, davlat bu zuluklardan kechib maydonni mard, halol, mas’uliyatli raqobatchilarga tezroq bo‘shatib berishi kerak”, — deya xulosa qildi Rasul Kusherbayev.

Energetika vazirligi uning bu munosabatiga javob qaytardi

Vazirlik “O‘zbekneftegaz”, “Issiqlik elektr stansiyalari” va “Hududiy elektr tarmoqlari” uchun ajratilgan subsidiya shaklida davlat yordami ko‘rsatilganligini iste’molchilarni, birinchi navbatda O‘zbekiston aholisini muntazam ravishda sifatli gaz va elektr energiyasi bilan ta’minlash zaruriyati bilan izohladi. Shuningdek, ushbu mablag‘larning ajratilishi to‘g‘risidagi qaror Prezident qaroriga asosan maxsus komissiya tomonidan qabul qilinganligini qayd etdi.

“Ma’lumki, elektr va gaz ta’minoti sohalari barqaror faoliyat yuritishi uchun katta moddiy xarajatlar talab qilinadi. Bu eng avvalo, har kunlik jarayon bilan bog‘liq bo‘lib, unda ulkan sanoat zanjiri ishtirok etadi. Ushbu zanjir tarkibida elektr energiya ishlab chiqaruvchi, yer qa’ridan gaz oluvchi, uni yetkazib berish, taqsimlash bilan, ayni paytda gaz va elektr ta’minoti tizimlarining holatini kuzatish bilan shug‘ullanuvchi kompaniyalar mavjud.

Bundan tashqari, har yili yoz faslida bu sohada butun tizimni kuz-qish mavsumiga tayyorlash, yilning sovuq faslida uzulishlarga yo‘l qo‘ymaslik maqsadida qo‘shimcha ishlar olib boriladi”, — deyiladi vazilik javobida.

Shuningdek, Energetika vazirligi, karantin davrida O‘zbekiston aholisini ijtimoiy qo‘llab-quvvatlash maqsadida elektr energiya va gaz ta’minotidan ularning iste’moli uchun o‘z vaqtida haq to‘lamaganlarni tarmoqdan uzmaslik to‘g‘risida qaror qabul qilinganligi va tizimning faoliyat yuritishi uchun zarur bo‘lgan mablag‘lar bilan ularning iste’moli uchun kelib tushayotgan mablag‘lar o‘rtasida uzulish vujudga kelganligini, ta’kidladi.

“Ayni paytda, to‘lovlar bilan bog‘liq vaziyat yaxshilangach, davlat tomonidan sohani qo‘llab-quvvatlashga ajratilgan mablag‘lar budjetga qaytariladi”, — deyiladi xabarda.

Energetika vazirligi “deputat Rasul Kusherbayevning balandparvoz fikrlarni bildirishdan avval o‘zi tilga olgan tuzilmalarga murojaat qilgan taqdirda, u shubhasiz tegishli javoblarni olgan bo‘lar edi. Mas’uliyati shaxslar tomonidan bildiriladigan fikrlar masalaning mohiyatini yaxshi bilishga asoslanishi kerak. Buning natijasida faqat asossiz da’volarga o‘rin qolmas edi”, — deya ta’kidladi.

Vazirlik pandemiya davrida iqtisodiyotni qo‘llab-quvvatlash bo‘yicha choralar dunyoning barcha mamlakatlarida, jumladan, Yevropa komissiyasi, AQSh hukumati va boshqa mamlakatlar hukumatlari tomonidan qabul qilinayotganligini eslatdi.

Avvalroq Kusherbayev UzAuto Motors’ning tez yordam xizmati uchun Damas’larni ham oshirilgan narxda sotayotganini tanqid qilgan, “O‘zavtosanoat” uning tanqidiga javob qaytargan, deputat esa “siz baribir monopol va nomard ishtirokchi sifatida qolaverasiz”, deb javob bergandi.