АОКА 2020 йилнинг 5 август куни тадбирлар залида Соғлиқни сақлаш вазирлиги ва Коронавирусга қарши кураш штаби аъзолари иштирокида ОАВ вакиллари учун матбуот анжумани ўтказилди.

Штаб аъзоси Ражаббой Исроиловнинг айтишича, пойтахтдаги барча касалхоналарда патологоанатомия бўлимлари ташкил қилиниб, маййитни ўша жойдан яқинларига бериш тартиби йўлга қўйилиши кутилмоқда.

Фото: UzReport

«Касаллик бор экан, ўлим ҳам бўлиши мумкин. Коронавирус тарқалишини олдини олиш ва чегаралаш учун барча шифохоналарда COVID-19 ва бошқа касалликдан нобуд бўлганлар жасадини фақатгина республика патологоанатомия маркази орқали ювиб, тараб, дезинфекциялаб бериш йўлга қўйилган эди. Агар бемор коронавирусдан вафот этган бўлса, ташкилий усулда мозорга олиб борилар, бошқа касалдан вафот этган бўлса, қариндош-уруғларига берилиб, уни ҳам уйигача кузатиб, ўзининг маҳалласида дафн қилинар эди.

Ўлим ҳолати бир жойда йиғилиб қолмаслиги учун ҳукуматимиз ва Соғлиқни сақлаш вазирлиги томонидан Тошкент шаҳридаги барча касалхоналарда патологоанатомия бўлимларини ташкил қилиб, маййитни ўша жойдан яқинларига беришни ташкил этиш бўйича кўрсатма берилди. Кўрсатма тайёр, унга шу кунларда имзо қўйилиб, албатта, оммага эълон қилинади», — деди Исроилов, дея унинг сўзларини келтирмоқда «Дарё» мухбири.