Шуҳрат Ғаниев: Фарғона вилоятида уйсиз бирорта оила қолмайди

Фарғона вилояти ҳокимлигининг ахборот хизмати вилоятда 2020 йил охиригача 10 140 та уй қурилиб, кам таъминланган, муҳтож, кўп болали, оила аъзоларидан бири ногирон бўлган оилаларга топширилишини хабар қилди.

Қайд этилишича, ҳудудда аҳоли зич экани боис уй-жой мавзелари Марказий Фарғона чўллари томон кириб бормоқда. 2020 йилнинг қолган қисмида қумлоқ барханлар, ўзлаштирилмаган ерларда 1400 та якка тартибдаги ҳар бири олти сотих ерга эга намунали лойиҳа уйларидан қурилади.

Хабарга кўра, Олтиариқ туманининг Марказий Фарғона чўлларидаги ерларида қурилиш ишлари олиб борилмоқда. Бу ерда 10 та якка тартибдаги уйлар қурилади ва сентябргача уйларнинг 5 таси фойдаланишга топширилади. Уйлар аҳолига ҳукумат қарорига кўра ипотека кредити асосида берилади. Яъни оила уйнинг умумий нархидан дастлабки ўн фоизини тўлайди. Қолган 90 фоизи 20 йиллик кредитга берилади.

Фарғона вилояти ҳокими Шуҳрат Ғаниев чўл массивида қурилаётган уйлар, қурувчи-мутахассислар билан учрашиб, улар билан суҳбатлашган.

«Вилоятимиздан 44 минг меҳнат муҳожири Россияда қурувчи бўлиб ишлаган ва пандемия туфайли қайтиб кетолмаган. Биз уларнинг 39 мингини вилоятдаги қурилиш объектларига ишга жойладик», – деган Шуҳрат Ғаниев.

Шунингдек, вилоят электр тармоқлари бошқармаси ўзининг ишчи хизматчилари учун Марказий Фарғонада 50 та якка тартибдаги 6 сотихли уй-жойлар қурмоқда. Касаба уюшмалари билан келишган ҳолда уйнинг дастлабки 10 фоизли тўловини корхона тўлаб беради. Қолган қисмига ходимлар учун 20 йиллик кредит расмийлаштирилади.

«Фарғона вилоятида уйсиз бирорта оила қолмайди. Мақсадимиз ҳукумат олдимизга қўйган вазифани бажариб, одамлар бугун бахтли яшашини таъминлаш», – деган Фарғона вилояти ҳокими Марказий Фарғона чўлларида бўлган учрашувларда.