Фарғона вилояти Фарғона туманида катта йўлда юзага келган жанжал иштирокчиси таъқибдан қочиб, юриб кетаётган ва муайян вақт давомида секинлашга «Зил»га осилди. Юк машинаси ҳайдовчисининг тўхтаб йигитни огоҳлантирганига қарамай, у яна ҳаракатланиб кетаётган «Зил»га тирмашган ва машинанинг остига кириб кетиб, ҳалок бўлган. Бу ҳақда Йўл ҳаракати хавфсизлиги бош бошқармаси хабар берди.
Хабарга кўра 4 август куни соат 18:00 ларда Фарғона туманидаги автомобиль йўлида бир нечта фуқаро ўртасида жанжал юзага келган. Воқеа жойига яқинлашган «Зил-130» юк машинаси ҳайдовчиси вазиятдан бехабарлиги учун уловни секинлатган.
Ҳайдовчининг ҳикоя қилишича тўпланиб турган одамлар орасидан икки йигит чиққан ва «Зил»га қарама-қарши тарзда югурган. Ҳайдовчи йигитларга зарар етказмаслик учун машина тезлигини камайтирган. У икки йигит турган жойдан қўзғалиб ҳаракатни давом эттирган вақтида эгнида кўйлаги йўқ йигит машинага осилиб олган. «Зил» тўхтаган ва ҳайдовчи йигитга машинага осилмасликни айтган.
Бироқ юк машинаси ҳаракатлана бошлаганида яна осилган ва ҳайдовчи автомобиллар оқимини ҳисобга олиб, тезликни камайтириб тўхташга уринаётган вақтда, кутилмаганда «Зил» остига кириб кетиб воқеа жойида ҳалок бўлган.
Аввал 2020 йил 24 июль куни Жиззах вилоятида 21 ёшли С.Б. бошқарувидаги «Зил»га осилиб олган икки йўловчидан бири, ҳайдовчининг таниши 18 ёшли А.С. ҳаракатланиб кетаётган юк машинасидан сакраган ва асфальт қопламаси устига боши билан йиқилиши оқибатида олган тан жароҳати туфайли ҳодиса жойида вафот этганди.
Шунингдек, 2020 йил 30 июлда Тошкент шаҳар Олмазор туманида 28 июль куни Isuzu автобуси ва юк машинаси иштирокида юз берган йўл-транспорт ҳодисаси оқибатида автобус ағдарилиб кетгани хабар қилинган. 2020 йил 29 июль куни 28 ёшли ҳайдовчи М.А. «Зил-130» юк машинасини Фарғона вилояти Ўзбекистон туманининг Ўқчи дашт қишлоғи ҳудудида бошқариб кетаётиб, йўлнинг қатнов қисмидан кесиб ўтаётган Қ.Б.ни уриб юборган, 66 ёшли жабрланувчи тан жароҳати олиб, воқеа жойида вафот этганди.
Изоҳ (0)