Москвада Lada 4х4 модели ғилдираклар устидаги уйга айлантирилди (фото)

«АвтоВАЗ» маҳсулотларини қайта ишлаш билан шуғулланувчи Москвадаги Lux Form компанияси Lada 4х4 («ВИС-2346») базасида яратилган автоуйни тақдим этди. Машинанинг минимал нархи 22,4 минг долларни, максимал нархи — 29,4 минг долларни ташкил этади, деб хабар беради Motor.

«Нива»нинг узунлиги 4796 миллиметрни, эни — 1746 миллиметрни, баландлиги эса — 2776 миллиметрни ташкил этади. Машина ичидан бир ўриндиқли диван, йиғма стол, раковинага эга ошхона, газ плитаси ва музлаткич ўрин олган. Кечаси ошхона зонаси трансформер-каравот ҳисобига ётоқхонага айланади.

Шунингдек, ғилдираклар устидан уй ичидан душ, санузел, гардероб, 220 вольтли розетка, USB разём, беш литрли бойлер, ичимлик суви учун 70 литрли, қўл ювишга мўлжалланган сув учун 40 литрли бочкалар ўрнатилган.

Автоуй «Нива»нинг 83 от кучига эга стандарт 1,7 литрли двигатели ёрдамида ҳаракатга келади. У эса беш поғонали механик узатмалар қутиси ёрдамида бошқарилади.

Аввалроқ «УАЗ» пикапи уч кишилик модулга эга автоуйга айлантирилгани тўғрисида хабар берилганди.