2020 йил 3 август куни соат 17:50 атрофида Тўрақўрғон тумани «Янгиҳаёт» МФЙ ички йўлида Chevrolet Tracker русумли автомашинани бошқариб кетаётган ҳайдовчи ҳаракат хавфсизлигини таъминлай олмай, йўлни кесиб ўтаётган 6 ёшли болани уриб юборган. Бу ҳақда «Дарё»га Наманган вилоят ИИБ ЙҲҲБ матбуот хизмати маълум қилди.
Натижада жабрланувчи оғир тан жароҳати олиб, шифохонада вафот этган.
Худди шу куни соат 21:30 ларда Поп тумани, «Тепақўрғон» маҳалласи ҳудудида М-412 русумли автомашинани бошқариб кетаётган ҳайдовчи қарама-қарши йўналишда ҳаракатланиб келаётган Nexia русумли автомашина билан тўқнашган.
ЙТҲ оқибатида Nexia ҳайдовчиси оғир тан жароҳати олиб, воқеа жойида ҳалок бўлган. Турмуш ўртоғи эса касалхонанинг жонлантириш бўлимига жойлаштирилган.
Ҳозирда мазкур ҳолатлар юзасидан суриштирув ишлари олиб борилмоқда.
Маълумот учун, Наманган вилоятида 2020 йилнинг 6 ойи мобайнида 248 та йўл-транспорт ҳодисаси содир бўлган. Оқибатда 67 киши ҳалок бўлди, 228 нафар фуқаро турли даражада тан жароҳатлари олди.
Изоҳ (0)