Фарғона вилоятининг Ўзбекистон туманида юк машинаси пиёдани уриб юборди. Оқибатда 66 ёшли пиёда воқеа жойида вафот этди. Бу ҳақда «Дарё»га вилоят ИИБ ахборот хизмати маълум қилди.
Қайд этилишича, воқеа 2020 йил 29 июль куни содир бўлган.
28 ёшли ҳайдовчи М.А. «Зил-130» юк машинасини Ўзбекистон туманининг Ўқчи дашт қишлоғи ҳудудида бошқариб кетаётиб, йўлнинг қатнов қисмидан кесиб ўтаётган Қ.Б.ни уриб юборган. Натижада 66 ёшли жабрланувчи тан жароҳати олиб, воқеа жойида вафот этган.
Ҳозирда ҳолат бўйича туман ИИБ ҳузуридаги тергов бўлими томонидан Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, аввалроқ Наманганда Matiz ҳайдовчиси велосипед бошқариб кетаётган фуқарони уриб юборгани, жабрланувчи шифохонада вафот этгани хабар берилганди. Қашқадарёда эса Cobalt ҳайдовчиси 14 ёшли қиз ва унинг 3 ёшли жиянини уриб кетганди. ЙТҲ иштирокчиларидан бири воқеа жойида, яна бири эса шифохонада вафот этганди.
Изоҳ (0)