Коронавирусни даволаш доирасида вужудга келаётган муаммоларни тезкорлик билан бартараф этиш мақсадида Тошкент шаҳар ҳокимлиги «Sogboling.uz» интерфаол хизматини ишга туширди.
«Sogboling.uz» — бу интерфаол хизмат бўлиб, унинг вазифаси — тиббиёт ходимларининг Тошкент шаҳридаги тиббиёт муассасаларида даволанаётган коронавирус билан касалланган беморларга муносабати ва тақдим этилаётган тиббий хизматлар сифати тўғрисида актуал маълумотларни тўплаш.
Фойдаланувчилар қуйидаги тоифаларда кўрсатиладиган хизматлар сифатини баҳолашлари мумкин: озиқланиш, даволаниш, яшаш шароитлари, дори-дармон таъминоти, тиббиёт ходимларининг муносабати. Бундан ташқари, баҳолаш жараёнида фойдаланувчилар фотосуратлар, видео ва аудиоёзувларни бириктиришлари мумкин. Шунингдек, фойдаланувчилар ноқонуний ҳаракатлар ёки тиббий муассасаларда бўлганларида дуч келган бошқа муаммолар ҳақида хабар беришлари мумкин.
Муаммони ҳал қилиш тўғрисида қарор қабул қилиш учун фойдаланувчилар томонидан юборилган ҳар бир сигнал батафсил кўриб чиқилади.
«COVID-19 бўйича тиббий хизматдан фойдаланган ҳар бир фуқаронинг фикри пандемия билан курашиш ишларини такомиллаштириш учун муҳим. Бу мутахассислар ва тиббиёт муассасалари ходимларига беморларни даволашни максимал равишда самарали, карантин даврини эса янада қулай қилишга ёрдам беради», — дейилади хабарда.
Эслатиб ўтамиз, Республика махсус комиссиясининг 26 июлдаги қарорида фуқароларга қулайлик яратиш, шунингдек, уларга малакали тиббий ёрдамни ўз вақтида кўрсатишни таъминлаш мақсадида махсус поликлиникалар ва махсус тақсимлаш марказларининг тун-у кун фаолият кўрсатиши белгиланганди.
Изоҳ (0)