Қарши шаҳридаги сартарошхоналар ва гўзаллик салонлари шаҳар махсус комиссияси рухсати билан 4 августдан яна ўз фаолиятини давом эттирмоқда. Бу ҳақда «Дарё»га шаҳар ҳокимлиги ахборот хизмати раҳбари Умид Жабборов хабар берди.
Таъкидланишича, Қарши шаҳар ҳокими Нормўмин Холбоев сартарошхоналар ва гўзаллик салонлари эгалари билан учрашиб, ишни карантин талаблари асосида ташкил этиш, санитария-гигиена қоидаларига қатъий амал қилиш, кириш-чиқиш жойларини пирометрлар, антисептик воситалар билан таъминлаган ҳолда фаолият юритиш зарурлигини таъкидлаган.
Умид Жабборовнинг қўшимча қилишича, шаҳарда, шунингдек, ноозиқ-овқат дўконлари, кийим-кечак сотувчи дўконлар ва маиший хизмат кўрсатувчи масканлар фаолиятига ҳам рухсат этилган.
«Буюм бозорлари ва умумий овқатланиш корхоналарига ҳозирча рухсат этилмаган, аммо босқичма-босқич бошқа фаолият турларига ҳам рухсат берилиши мумкин», — деди шаҳар ҳокимлиги ахборот хизмати раҳбари.
Эслатиб ўтамиз, аввалроқ Қарши шаҳри барча автомобиллар учун очилгани, 3 августдан бошлаб шаҳарга белгиланган вақтда кириб-чиқишга рухсат этилгани ҳақида хабар берилганди.
Изоҳ (0)