Ўзбекистон Давлат божхона қўмитаси коронавирус пандемияси даврида ўпкани сунъий нафас олдириш аппаратлари ҳамда кислород концентраторларига бўлган талабнинг ошгани сабаб қурилмаларнинг импорти соддалаштирилгани ва мазкур товарлар «яшил» йўлаклар орқали ўтказилаётгани тўғрисида маълумот берди.
Таъкидланишича, бу турдаги маҳсулотларни тадбиркорлар томонидан республикага ҳеч қандай тўсиқларсиз олиб кирилишига алоҳида эътибор қаратилмоқда.
Хусусан, Президентнинг 2020 йил 3 апрелдаги «Коронавирус пандемияси даврида аҳоли, иқтисодиёт тармоқлари ва тадбиркорлик субъектларини қўллаб-қувватлашга доир қўшимча чора-тадбирлар тўғрисида»ги фармони билан тасдиқланган рўйхатга мувофиқ озон, кислород ва аэрозол терапияси учун сунъий нафас олдириш ёки бошқа терапевтик нафас олдириш аппаратларини Ўзбекистон ҳудудига олиб киришда 2020 йил 31 декабрга қадар божхона божи ва акциз солиғидан озод қилинган.
Бундан ташқари, Вазирлар Маҳкамасининг «Коронавирус пандемияси даврида дори воситалари, тиббий буюмлар ва тиббий техникалар муомаласини тартибга солишга доир чора-тадбирлар тўғрисида»ги 2020 йил 22 июлдаги қарорига мувофиқ, 2020 йил 1 октябрга қадар бўлган муддатда кислород концентраторлар импорт қилинганда давлат рўйхатидан ўтказилмасдан ва мажбурий сертификатлаштирилмасдан божхона расмийлаштирувини амалга ошириш ва реализация қилиш белгиланган.
Мазкур имтиёзлардан самарали фойдаланган ҳолда ташқи иқтисодий фаолият иштирокчилари томонидан сўнгги 1 ҳафта давомида республикага қиймати 4,3 миллион АҚШ долларига тенг 394 дона ўпкани сунъий нафас олдириш ускуналари ҳамда қиймати салкам 2,9 миллион долларга тенг 5899 дона кислород концентраторлари келтирилган бўлиб, мазкур тиббий жиҳозлар келтирилган куннинг ўзидаёқ соддалаштирилган тартибда божхона расмийлаштирувидан ўтказилган.
Мазкур товарлар божхона органлари фаолиятига жорий қилинган «Хавфни бошқариш тизими» орқали асосан «яшил» йўлакларда расмийлаштирилган бўлиб, божхона расмийлаштирувига ўртача 1—1,5 соатгача вақт сарфланган.
«Турли тушунмовчиликларни олдини олиш мақсадида тадбиркорлар эътиборига шуни етказиш лозимки, Ўзбекистон Президентининг 2019 йил 10 апрелдаги ‘2019—2021 йилларда республиканинг фармацевтика тармоғини янада жадал ривожлантириш чора-тадбирлари тўғрисида’ги фармони талабларига мувофиқ, 2019 йил 1 июлдан бошлаб импорт дори воситалари (дори субстанциялари бундан мустасно) ва тиббиёт буюмларини ‘эркин муомалага чиқариш (импорт)’ божхона режимига расмийлаштиришда божхона қийматининг 1,2 фоизи миқдорида божхона расмийлаштируви учун йиғим ундирилиши ва ушбу йиғим Фармацевтика тармоғини қўллаб-қувватлаш ва ривожлантириш жамғармасини шакллантириш манбааси сифатида белгиланган», — дейилади хабарда.
Бундан ташқари, Ўзбекистон Президентининг «Соғлиқни сақлаш соҳасида хусусий секторни янада ривожлантириш чора-тадбирлари тўғрисида» 2017 йил 1 апрелдаги қарорига мувофиқ, белгиланган тартибда шакллантириладиган рўйхат бўйича юридик шахслар томонидан олиб келинадиган янги тиббиёт асбоб-ускуналари, бутловчи буюмлар ва уларнинг эҳтиёт қисмлари ҳамда сарфлаш материаллари 2022 йил 1 январга қадар божхона тўловларидан, шу жумладан, қўшилган қиймат солиғидан озод этилган.
Ҳозирда тадбиркорлар мазкур имтиёзлардан фойдаланиш учун Иқтисодий тараққиёт ва камбағалликни қисқартириш вазирлиги ҳузуридаги «Лойиҳалар ва импорт контрактларини комплекс экспертиза қилиш маркази» давлат унитар корхонасининг info@expertcenter.uz электрон почта манзилига тегишли ҳужжатларни юбориб, қисқа фурсатларда марказнинг ижобий хулосасини олишлари мумкин.
Шунингдек, тақдим этиладиган ҳужжатлар ва тегишли хулосани тезкорлик билан олиш бўйича қўшимча саволлар юзасидан марказнинг 71-207-02-65 (64) телефон рақамларига ҳамда Давлат божхона қўмитасининг 1108 қисқа рақамли ишонч телефонига мурожаат қилишлари мумкин.
Бу турдаги тиббий ускуналарнинг асосий қисми республикага ҳаво транспорти орқали олиб келинаётгани сабабли, тадбиркорлар ўзларини қизиқтирган саволлар юзасидан «Тошкент-Аэро» ихтисослаштирилган божхона комплексининг (78) 120-86-30 телефон рақамига куннинг исталган пайтида қўнғироқ қилиб, жавоб олишлари учун барча имкониятлар яратилган.
Бугунги кунда божхона идораларида товарларни республика ҳудудига олиб кирилгунга қадар дастлабки декларация асосида расмийлаштириш имкониятлари ҳам яратилган бўлиб, тадбиркорлар ушбу имкониятлардан онлайн равишда фойдаланишлари мумкин.
«Давлат божхона қўмитаси кислород концентраторлари импорти жараёнига доир холис ва ҳаққоний хабарларни эълон қилишда оммавий ахборот воситалари, кенг жамоатчилик вакиллари билан ўзаро ҳамкорликка доимо тайёр эканини маълум қилади», — дейилади хабарда.
Эслатиб ўтамиз, 20 июль куни Шавкат Мирзиёев Ўзбекистонда коронавирус инфекциясига қарши кураш борасида олиб борилаётган ишларнинг чуқур танқидий таҳлилига бағишланган видеоселектор йиғилишида кислород концентраторларини Ўзбекистонга олиб келиш учун махсус самолёт ажратиш ҳақида кўрсатма берганди.
Изоҳ (0)