Андижон туман тиббиёт бирлашмаси бошлиғи вафот этди. У вилоятда коронавируснинг иккинчи қурбони ҳисобланади

Андижон вилоятида коронавирусдан вафот этган иккинчи бемор Андижон туман тиббиёт бирлашмаси бошлиғи бўлган. Бу ҳақда хабар берган «Дарё» мухбирининг ёзишича, вилоят соғлиқни сақлаш бошқармаси марҳумнинг коронавирусдан вафот этганини тасдиқлаган.

Андижонлик беморнинг вафоти ҳақида хабар берган Соғлиқни сақлаш вазирлиги унинг тиббиёт ходими эканлиги ҳақида маълумот бермаган.

«Андижон туманида яшаган 63 ёшли Б.П. (эркак)да COVID-19’ тасдиқлангач, нафас етишмовчилиги белгилари кучайган ҳолатда вилоят юқумли касалликлар шифохонасининг реанимация бўлимига ётқизилган. Унга COVID-19’ инфекциясининг ўта оғир кечиши, икки томонлама пневмония ташхиси қўйилган. Касаллик ўткир респиратор дистресс синдроми, ўткир юрак қон-томир ва нафас етишмовчилиги асоратлари билан кечган», — дейилади вазирлик хабарида.

Вазирлик марҳумнинг 2016 йил инфаркт ўтказганини қўшимча қилиб, «бемор юрак ишемик касаллиги, стабил зўриқиш стенокардияси, сўнгги кардиосклероз, гипертония, артериал гипертензия, қандли диабет, диабетик ангиопатия ва нефропатия каби ҳамроҳ хасталиклари билан ҳам оғриган. Бемор ўткир нафас, юрак қон-томир ҳамда полиорган етишмовчилигидан вафот этган», — деган.

«Дарё» мухбирининг аниқлаштиришича, марҳум 2017 йилдан буён Андижон туман тиббиёт бирлашмаси бошлиғи вазифасида ишлаб келган Бахтиёр Патидинов бўлган. Шу боисдан ҳам унинг вафоти муносабати билан вилоят соғлиқни сақлаш бошқармаси расмий каналида таъзия эълон қилинган.

Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган.

Шунингдек, 19 июль куни Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов коронавирус асоратларидан вафот этгани хабар қилинган.

31 июль куни Жиноят ишлари бўйича Тошкент вилоят суди судьяси, 53 ёшли Хайриддин Шермуҳамедов, 1 август куни Тойлоқ тумани прокурори Фарҳод Абдухолиқов, 3 август куни Бухоро халқаро аэропорти директори Тоҳир Баҳронов 61 ёшида вафот этгани хабар берилди. Бироқ ушбу тўққиз ҳолат ҳақида ССВ томонидан айни вақтгача ахборот берилмаган.