Koronavirusni davolash doirasida vujudga kelayotgan muammolarni tezkorlik bilan bartaraf etish maqsadida Toshkent shahar hokimligi “Sogboling.uz” interfaol xizmatini ishga tushirdi.
“Sogboling.uz” — bu interfaol xizmat bo‘lib, uning vazifasi — tibbiyot xodimlarining Toshkent shahridagi tibbiyot muassasalarida davolanayotgan koronavirus bilan kasallangan bemorlarga munosabati va taqdim etilayotgan tibbiy xizmatlar sifati to‘g‘risida aktual ma’lumotlarni to‘plash.
Foydalanuvchilar quyidagi toifalarda ko‘rsatiladigan xizmatlar sifatini baholashlari mumkin: oziqlanish, davolanish, yashash sharoitlari, dori-darmon ta‘minoti, tibbiyot xodimlarining munosabati. Bundan tashqari, baholash jarayonida foydalanuvchilar fotosuratlar, video va audioyozuvlarni biriktirishlari mumkin. Shuningdek, foydalanuvchilar noqonuniy harakatlar yoki tibbiy muassasalarda bo‘lganlarida duch kelgan boshqa muammolar haqida xabar berishlari mumkin.
Muammoni hal qilish to‘g‘risida qaror qabul qilish uchun foydalanuvchilar tomonidan yuborilgan har bir signal batafsil ko‘rib chiqiladi.
“COVID-19 bo‘yicha tibbiy xizmatdan foydalangan har bir fuqaroning fikri pandemiya bilan kurashish ishlarini takomillashtirish uchun muhim. Bu mutaxassislar va tibbiyot muassasalari xodimlariga bemorlarni davolashni maksimal ravishda samarali, karantin davrini esa yanada qulay qilishga yordam beradi”, — deyiladi xabarda.
Eslatib o‘tamiz, Respublika maxsus komissiyasining 26-iyuldagi qarorida fuqarolarga qulaylik yaratish, shuningdek, ularga malakali tibbiy yordamni o‘z vaqtida ko‘rsatishni ta’minlash maqsadida maxsus poliklinikalar va maxsus taqsimlash markazlarining tun-u kun faoliyat ko‘rsatishi belgilangandi.
Izoh (0)