COVID-19’ни даволашда қандай дори-дармонлар қўлланилилиши мумкинлиги ҳақида маълумот берилди

Соғлиқни сақлаш вазирлигининг хабар қилишича, «COVID-19 билан касалланган беморларни даволаш бўйича вақтинчалик кўрсатмалар» нинг олтинчи нашрида шифокор назорати асосида қўлланиладиган дори-дармонлар ҳам келтириб ўтилган.

Қайд этилишича, мазкур қўлланмани ишлаб чиқиш гуруҳига Ўзбекистоннинг таниқли ва нуфузли олимлари билан бирга, айни пайтда коронавирус инфекцияси билан касалланган беморларни бевосита даволашда иштирок этаётган шифокорлар, хусусан, реаниматолог ва бошқа тор соҳа врачлари киритилган ва улар томонидан ўз тажрибасида самарали деб топилган дори воситалари тавсия этилган.

Соғлиқни сақлаш вазирлиги қошидаги Коронавирусга қарши кураш бўйича штаб аъзоси, тиббиёт фанлари доктори, профессор Ҳабибулло Оқилов беморларни даволашда қўлланилиши белгиланган дори воситалари ҳақида батафсил маълумот берди:

Беморлар билан мулоқотда бўлганлар учун:

•  «Гидроксихлорохин» (ҳомиладор аёллар, болалар, 65 ёшдан ошган беморлар, юрак-қон томир тизими касалликлари мавжуд бўлган беморлар қабул қилиши мумкин эмас).

Касаллик клиник белгиларсиз кечганда:

• «Гидроксихлорохин» (шифокор тавсиясига кўра);
• «Цинк» препаратлари;
• D витамини;
• C витамини;

COVID-19’нинг енгил шаклида:

• «Парацетамол»;
• «Ибупрофен»;
• «Фавипиравир»;
• «Гидроксихлорохин»;
• «Цинк»;
• «D Витамин»и;
• «C Витамин»и;
• «Нафазолин», «Ксилометазолин» (бурун учун, ринореяни даволашда);
• «Азитромицин» (шифокор қарорига кўра).

COVID-19’нинг ўрта оғир шаклида:

• «Парацетамол»;
• «Ибупрофен»;
• «Фавипиравир» ёки «Ремдесивир»;
• Антикоагулянтлар («Эноксапарин»);
• Антиагрегантлар («Ацетилсалицил кислотаси»);
• Кортикостероидлар («Дексаметазон»);
• Антибиотиклар (шифокор тавсиясига кўра).

COVID-19’нинг оғир шаклида:

• «Парацетамол»;
• «Ибупрофен»;
• «Ремдесивир»;
• Антикоагулянтлар («Эноксапарин»);
• Антиагрегантлар («Ацетилсалицил кислотаси»);
• Кортикостероидлар («Дексаметазон»);
• Сефалоспоринлар + макролидлар;
• Парентерал ацетилсистеин ва бошқалар

Ўткир нафас олиш қийинлашуви синдромида:

• Антикоагулянтлар («Эноксапарин»);
• Антиагрегантлар («Ацетисалицил кислота»);
• Кортикостероидлар («Дексаметазон»);
• Парентерал ацетилсистеин;
• «Омепразол», «Ранитидин» ва бошқалар.

Сепсис ва сепсик шокда:

• Н2 рецепторлари антагонистлари ёки Протон помпаси ингибиторлари («Ранитидин», «Омепразол»);
• Кортикостероидлар («Дексаметазон»);
• Прокинетик дорилар («Метоклопрамид», «Домперидон», «Эритромицин») ва бошқалар.

16 июль куни Ўзбекистон бош вазири Абдулла Арипов раҳбарлигида коронавирус пандемиясига қарши курашиш бўйича Республика махсус комиссиясининг йиғилишида уйида даволанаётган коронавирус беморларини бепул дори-дармонлар билан таъминлаш юзасидан қарор қабул қилиниб, уларга етказиб бериладиган дори-дармонлар рўйхати тасдиқланган. Ушбу рўйхатга «Гидроксихлорохин», «Азитромицин», «Парацетамол», «C Витамин» каби дори-дармонлар киритилган. 19 июлда эса Республика махсус комиссияси аъзоси, профессор Феруза Ҳамробоева ЖССТ самарасиз деб топган «Гидроксихлорохин» препарати Ўзбекистонда нега қўлланилаётганига изоҳ берган ва коронавирусга қарши курашда сезиларли ютуқларга эришган Хитой билан вебинарлар ўтказилаётгани, клиник протокол бир умрлик ҳужжат эмаслиги, у доим қайта кўриб чиқилишини айтганди. Кейинчалик Ҳамробоеванинг ўзи «Тез ёрдам» кўрсатувида 13 июлда дори даволаш протоколидан олиб ташлангани, расмий протокол кўриб чиқилгани ва бепул тарқатилувчи тўртталик дори-дармон гуруҳи ичидаги «Гидроксихлорохин» даволаш протоколидан чиқарилганини билдирган.

Кейинчалик «Миллий ТВ» телеканалидаги «Тез ёрдам» кўрсатувида иштирок этган Инновацион соғлиқни сақлаш миллий палатаси тиббий стандарт ва протоколларни ишлаб чиқариш бўлими бошлиғи Ёдгорова Клара Тоҳировна Жаҳон соғлиқни сақлаш ташкилоти ва бошқа кўплаб давлатлар томонидан зарарли деб топилган «Плаквенил» дори воситасини даволаш протоколлардан чиқариб ташлаш ҳақида гапиргач, унга нисбатан таҳдидлар бўлганини маълум қилган.

Республика махсус штаби аъзоси Ҳабибулла Оқилов «Плаквенил» билан 12 мингга яқин беморни тузатиб касалхоналардан чиқариб юборилганини айтиб бу борадаги баҳснинг кескинлашишига сабабчи бўлди. Германиялик профессор Вернер Бер дунёда «Плаквенил»ни қўллаш бўйича аниқ кўрсатма йўқлигини таъкидлаган.

АҚШ бош инфекционисти Энтони Фаучи 31 июль куни Конгресснинг Вакиллар палатасида коронавирус инқирози бўйича тузилган комиссия олдида ҳисобот берган ва «Гидроксихлорохин»нинг коронавирусга қарши самараси бирор мукаммал тадқиқотда исботланмаганини айтган.

3 августда Ҳабибулла Оқилов ушбу доридан воз кечилганидан кейин Ўзбекистонда касаллик кўрсаткичлари салбий томонга ўзгаргани туфайли препарат яна протоколга киритилгани ва касалликка чалинганлар билан биринчи мулоқот қилганларга тавсия этилаётганини маълум қилди.