Коронавирусга қарши курашиш бўйича ССВ қошидаги махсус штаб аъзоси Ҳабибулло Оқилов «Замон» информацион дастуридаги чиқишида соғлиқни сақлаш вазири Алишер Шодмонов коронавирусдан даволанаётгани ҳақидаги тахминларни рад этди.
Фото: «Дарё»
«Ўз оти билан Республика ихтисослаштирилган кардиология илмий-амалий тиббиёт маркази бўлгандан кейин у ерда биз COVID-19 билан касалланганларни даволамаймиз. Ушбу муассасада юрагида у ёки бу сурункали хасталиги бор одам режали равишда бир йилда бир ёки икки марта, албатта, даволаниши керак. Шу жумладан вазири ҳам.
Бу ерда коронавирус тўғрисида гап йўқ. Мен кечаям гаплашдим, бугун ҳам гаплашдим. Кайфиятлари ёмон эмас, яхши. Худо хоҳласа 3-4 кун ичида даволаниб чиқадилар.
Юракда ёшга хос бўлган ўзгаришлар бўлади. Бундай ўзгаришлар вазирдаям, биздаям бор. Бундай ҳолатларда режали муолажаларни олгандан кейин ҳаммаси изига тушади. Алишер Шодмонов ҳам тез орада биз билан бирга яна фаол ишлай бошлайди деб ўйлайман», — дейди Ҳабибулла Оқилов.
Эслатиб ўтамиз, 30 июль куни Соғлиқни сақлаш вазири Алишер Шодмонов Республика ихтисослаштирилган кардиология илмий-амалий тиббиёт марказида стационар шароитда режали даволаш муолажаларини олаётгани, беморнинг аҳволи қониқарли экани ҳақида хабар берилганди. Соғлиқни сақлаш вазири вазифасини вақтинча бажариш бош вазирнинг ижтимоий масалалар бўйича ўринбосари Беҳзод Мусаев зиммасига юкланган.
Изоҳ (0)