Фарғона вилояти ички ишлар бошқармаси мактаб ўқитувчисининг ИИБ ходимлари томонидан калтакланиши ва бир оёқда туришга мажбур қилингани ҳақида Интернетда тарқалган хабарга муносабат билдирди.
Бошқарма ахборотига кўра, мазкур хабар ўрганилган ва ҳақиқатан ҳам 2020 йил 26 июль куни Фурқат туманидаги 34-сон ихтисослашган умумтаълим мактабида компьютер ўғирланиши билан боғлиқ ҳолат содир этилгани аниқланган.
Ўғирлик юзасидан Фарғона вилояти ИИБ ҳузуридаги тергов бўлинмаси томонидан Жиноят кодексининг тегишли моддаси билан жиноят иши қўзғатилиб, дастлабки тергов ҳаракатлари давом эттирилмоқда.
Бошқарма ИИО ходимларининг жисмоний тарбия ўқитувчиси Шуҳрат Жўраевни қийноққа солганлиги билан боғлиқ ҳолат юзасидан Фурқат туман прокуратураси томонидан терговга қадар текширув ҳаракатлари олиб бораётгани, мазкур ҳолат вилоят прокуратураси томонидан назоратга олинганини маълум қилган.
«Вилоят ИИБ томонидан ходимларнинг хатти-ҳаракатлари юзасидан хизмат текшируви ўтказилмоқда. Текширувлар якунига кўра, қўшимча хабар берилади», – дейилади Фарғона вилояти ИИБ расмий маълумотида.
Интернетда тарқалган хабарда жисмоний тарбия ўқитувчиси Шуҳрат Жўраев компьютерни ўғирлаганликда гумон қилиниб, Фурқат тумани ички ишлар бўлимига олиб кетилгани ва у ерда бир неча соат ушлаб турилгани, қийноққа солингани, калтакланганини маълум қилиб, воқеадан кейин соғлиғи кескин ёмонлашгани ҳамда ИИО ходимларига чора кўрилишини талаб қилгани айтилганди.
13 июлда Сирдарё вилояти назорат-ўтказиш пунктида судья ИИБ ходимлари томонидан калтакланган, шу куни ИИВ тақдим этган видеотасвирларда ИИБ ходимлари томонидан калтаклангани айтилган судья тез ёрдам машинасини ўтказиб юбормагани маълум бўлганди. Кейинчалик вазият иштирокчиси Жиноят ишлари бўйича Сирдарё вилояти суди судьяси Алишер Эргашев карантин постидаги воқеа бошқача бўлгани, бодикамерадаги ёзувлар монтаж қилинганини билдирган.
10 июль куни эса Сурхондарё вилояти Жарқўрғон туманида суд ходими ва унинг ҳайдовчисига милиция ходимлари томонидан жароҳат етказилгани хабар қилинган. Кейинчалик 15 июлда ушбу ҳолатга қонуний баҳо берилиши сенаторлик назоратига олингани айтилган.
Ундан аввал, 2020 йил 13 июнда Андижонда қийноққа солинган фуқаро вафоти сабаб 3 нафар ИИБ ходими ҳибсга олинган, воқеа 30 майда Андижон шаҳар Салоҳият кўчасида яшовчи фуқаро А.А. тан жароҳатлари билан касалхонага олиб келинишидан бошланган. Фуқаро 11 июнда вафот этган. 14 июнь куни Андижон вилояти Андижон шаҳар бўйича ички ишлар органлари (ИИО) фаолиятини мувофиқлаштириш бошқармаси (ФМБ) бошлиғи подполковник Содиқ Усмонов мазкур воқеа сабаб ишдан олинди. Кейинроқ ИИБда беш киши ишдан олингани ва 19 киши жазолангани маълум қилинди. Бош прокуратура айни иш доирасида олиб борилаётган тергов ҳаракатлари давомида 27 июнь куни жиноятга алоқадор деб топилган яна икки киши — 4-сонли ИИБ бошлиғи подполковник П.Мамажонов ҳамда мазкур бўлим жиноят-қидирув гуруҳининг яна бир тезкор вакили ҳам қамоққа олинганини маълум қилган.
Халқаро пресс-клуб сессиясида Ички ишлар вазири матбуот котиби Шоҳрух Ғиёсов Андижонда қийноққа солинган фуқаро вафоти сабаб узр сўраган. Бош прокуратура ИИБ ходимлари нима учун фуқарони қийноққа солганини маълум қилган.
Изоҳ (0)