Наманганда 216,2 миллион сўм бюджет маблағлари ишсизларга тўланмай талон-торож қилингани маълум бўлди

Наманган вилояти Наманган туманида Аҳоли бандлигига кўмаклашиш марказида бюджет маблағларининг талон-торож қилингани аниқланди. Бу ҳақда ЎзА хабар берган.

Қайд этилишича, Бош прокуратура ҳузуридаги департаментнинг Наманган туман бўлими томонидан ўтказилган терговга қадар текширувда, тумандаги Аҳоли бандлигига кўмаклашиш маркази мансабдор шахслари томонидан марказга иш сўраб мурожаат қилмаган ва ишсизлар рўйхатига киритилмаган 204 фуқаронинг жамоат ишларига жалб этилгани ҳақида сохта ҳужжатлар тузилган. Ушбу ҳужжатлар воситасида 216,2 миллион сўм бюджет маблағлари талон-торож қилинган.

Мазкур ҳолат юзасидан марказ мансабдор шахсларига нисбатан Жиноят кодексининг 167-моддаси 3-қисми «а» банди (Ўзлаштириш ёки растрата йўли билан талон-торож қилиш) ва 209-моддаси 1-қисми (Мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда, — дейилади агентлик хабарида.

2020 йил 7 июлда Тошкентнинг Сергели туманида ижтимоий ҳимояга муҳтож оилалар учун хайрия ҳисобига келиб тушган 95,8 миллион сўм маблағлар «Маҳалла» хайрия жамоат фонди Сергели бўлими мансабдор шахслари томонидан талон-торож қилингани маълум бўлган.

19 июлда Қашқадарё санитария-эпидемиология осойишталик марказида қарийб 918 миллион сўмлик бюджет маблағлари талон-торож қилингани аниқланган.

23 июлда Андижон вилояти Санитария-эпидемиологик осойишталик маркази мансабдор шахслари дезинфекцияловчи воситалар харид қилиш жараёнида 159,3 миллион сўмлик бюджет маблағларини талон-торож қилгани ойдинлашди. Шунингдек, шу куни Андижон вилояти Шаҳрихон туманида кам таъминланган оилаларга ажратилган 82,2 миллион сўм бюджет маблағлари талон-торож этилгани аниқлангани хабар қилинди. 27 июлда Сирдарё вилоятида Сардоба сув тошқинидан кейин эвакуация қилинган аҳоли учун мўлжалланган ноозиқ-овқат маҳсулотларини сохта ҳужжат орқали талон-торож қилиш ҳолатлари кузатилгани, жумладан Сардоба туман Қизил ярим ой жамияти раҳбари номидан сохта ҳужжатлар тайёрланиб, 53 миллион сўмлик маҳсулотлар махсус омбордан олиб чиқилгани ва номаълум шахсларга сотиб юборилгани маълум қилинган.