АҚШ президенти Дональд Трамп COVID-19 коронавирус инфекциясига қарши вакцинасини бошқа мамлакатларга етказиб бериш имкониятини истисно қилмади. Бу ҳақда Оқ уйга таяниб «РБК» хабар берди.
«Биз сунъий нафас олдириш мосламалари каби вакцинани ҳам дунёнинг бошқа қисмларига кўп миқдорда етказиб беришимиз мумкин», – деди Трамп.
Трампнинг таъкидлашича, вакцина АҚШга келганида тезда мамлакат бўйлаб тарқалади. АҚШ вакцина барча керакли тасдиқларни олган заҳоти 100 миллион дозани ишлаб чиқаришга тайёр бўлади ва шундан кейин мамлакат 500 миллион дозада ишлаб чиқаришни бошлайди.
Эслатиб ўтамиз, АҚШда 27 июль куни Moderna биотехнологик компаниясининг COVID-19 вакцинасини синовининг учинчи, якуний босқичи бошланди. Синовда 30 минг киши иштирок этмоқда. Хабарларга кўра, бу SARS-CoV-2 коронавирус вакцинасининг дунёдаги энг йирик клиник синовидир.
Шунингдек, Россия Мудофаа вазирлиги ҳам коронавирусга қарши вакцина яратилганини хабар қилган. Уни ишлаб чиқариш август ойида бошланиши мумкин. Шунингдек, Буюк Британиянинг 90 миллион дозалик COVID-19 вакцинасига буюртма бергани ҳақида ҳам хабар берилган эди.
Изоҳ (0)