Америкада коронавирусга қарши яратилаётган тестларнинг аксарияти — вақтнинг бекорга сарфланишига сабаб бўлмоқда, чунки уларнинг натижаси жуда узоқ кутилади. Бу ҳақда Microsoft асосчиси Билл Гейтс CNBC телеканалига берган интервьюсида маълум қилди.
«Ушбу аҳмоқгарчиликдаги энг оддий нарса — натижани 48 соатдан ортиқ кутиб, ҳеч кимга тест пулини тўлашингиз керак эмаслигида… Ушбу тест — вақтни бекорга сарфлаш. Ўтказилган тестлар сонига оид рақамларнинг аксарияти — бу вақтни беҳуда сарфлаш», — дейди бизнесмен.
Билл Гейтснинг фикрича, тест натижаларини имкон қадар тезроқ чиқишини йўлга қўйиш керак, чунки коронавирусга чалинган бемор бошқаларга касаллик юқтирмаслиги учун шунга қараб ўз хатти-ҳаракатларини ўзгартиради. Шунингдек, у кам даромадли фуқаролар таҳлиллар натижасини 24 соатдан ортиқ кутмасликлари кераклигини таъкидлаган.
Quest Diagnostics компанияси маълумотларига кўра, 28 июль оқшоми ҳолатига кўра ҳаёти ўта хавф остида бўлган беморлар, хусусан, касалхоналардаги беморлар, операция қилиниши керак бўлган беморлар ва касаллик аломатлари кузатилаётган тиббиёт ходимларининг тест натижаларини олиш ўртача икки кундан кўпроқ вақт олаётган эди. Қолган беморларнинг тест натижасига эса етти кун вақт кетади.
АҚШда пандемия бошланганидан буён коронавирусга 53 миллион тест ўтказилган бўлиб, уларнинг 5 миллиони мусбат чиққан. Бироқ бу мамлакатдаги касаллар сонига мос келмайди, чунки бир киши бир мартадан ортиқ тестдан ўтган бўлиши мумкин.
Эслатиб ўтамиз, июнь ойида Microsoft корпорацияси асосчиси коронавирусга қарши вакцина ниқоби остида одамларни оммавий чиплаштираётгани ҳақидаги айбловларга муносабат билдирган эди.
Изоҳ (0)