Twitter Дональд Трампнинг коронавирусга қарши дори мавжудлиги тўғрисидаги ретвитини ўчириб ташлади

Twitter, Facebook ва YouTube ижтимоий тармоқлари коронавирусга қарши дори воситаси мавжудлигини таъкидлаган бир гуруҳ шифокорларнинг видеосини ўчириб ташлади. Ушбу видеони АҚШ президенти Дональд Трамп ўзининг Twitter’даги саҳифаси орқали бўлишган, ижтимоий тармоқ эса уни «ишончсиз маълумот» дея ўчириб юборган, деб хабар беради CNN.

Видеода оқ халат кийиб олган одамлар Вашингтондаги АҚШ Олий суди қаршисида матбуот анжумани ўтказган. Улар «Американинг етакчи шифокорлари» гуруҳидан эканликларини таъкидлаган. Сўзга чиққанлар ниқоб тақишга зарурат йўқлигини, коронавирус тарқалишини тўхтатиш учун дори воситаси борлигини маълум қилган: «Гидроксихлорохин», «Рух» ва «Цитромакс». Шунингдек, улар «Гидроксихлорохин»нинг самарасиз эканлигини исботлаган тадқиқотлар ёлғон эканлигини ва уларга ҳамон «сохта фармкомпаниялар» ҳомийлик қилаётганини қайд этган.

Ижтимоий тармоқлар видеони ўчириб ташлагунига қадар, у интернетда кенг тарқалиб улгурган: Facebook’да 14 миллион маротаба кўрилган ва 600 минг мартадан ортиқ «улашилган», YouTube’да эса 40 минг мартадан ортиқ томоша қилинган.

Twitter’нинг аниқлик киритишича, ижтимоий тармоқ коронавирусга оид ишончсиз маълумотни аниқлаш ва ўчириб ташлаш сиёсати доираси иш тутган. Facebook эса видеонинг ўчирилишини «коронавирусга қарши дорилар ва уни даволовчи усуллар тўғрисида ишончсиз маълумотларни» тарқатгани билан изоҳлаган.

Кейинроқ Оқ уйда ўтказилган брифингда Трамп видео нима сабабдан ўчирилганини тушунмаётганини ва «Гидроксихлорохин»нинг коронавирусни даволашда фойдаси ҳақида маълум қилган. «Мен унга ишонаман. Ундан фойдаланган бўлардим. Биласизки, мен уни 14 кун давомида қабул қилиб келдим. Кўриб турганингиздек, ҳозир шу ердаман. Ўйлашимча, у эрта босқичларда фойда беради», — дейди Трамп.

Аввалроқ АҚШ президенти Дональд Трамп мамлакатда коронавирусга қарши вакцинанинг клиник синовлари якунига етганини эълон қилганди. Шунингдек, у яқин ҳафталарда яна тўртта вакцинанинг синови якунланишини билдирган. 27 июнь куни эса АҚШда коронавирусга қарши вакцинанинг дунёдаги энг кенг кўламли клиник синовлари бошланган.