Twitter АҚШ президентининг ўғли кичик Дональд Трампнинг аккаунтини блоклади. Бунга унинг ижтимоий тармоқнинг дезинформация сиёсатини бузадиган твити сабаб қилиб кўрсатилмоқда. Бу ҳақда Vice нашрига таяниб Meduza хабар бермоқда.
Бу вақтда кичик Трамп твит ёзолмайди, лайк қўёлмайди ва бошқаларнинг твитини қайта нашр (ретвит) қилолмайди. Лекин шахсий хабарлар ёзишга чекловлар йўқ.
Twitter вакили твит ўчирилмагунча аккаунт блокланганлигини билдирди.
Кичик Трампнинг аккаунти блокланишига сабаб бўлган твити «Гидроксихлорохин»ни COVID-19 учун дори сифатида реклама қилинган видеодан иборат эди. Агар Трампнинг твитига кирилса жойланган твит ижтимоий тармоқ сиёсатига тўғри келмаслиги ҳақида хабарнома чиқади.
Эслатиб ўтамиз, май ойи охирларида Twitter Трампнинг хабарини ўқувчиларга унинг ишончли эмаслигини, қайта текшириш талаб этилишини билдирувчи махсус белги билан ажратганди. Президент бу ҳолатни танқид қилиб ижтимоий тармоқни президентлик сайловларига аралашганликда айблаган, уни АҚШ ҳудудида ёпиб юбориш билан таҳдид қилганди.
Изоҳ (0)