Жаслиқда содир бўлган ЙТҲ оқибатида Volvo ва DAF юк машиналари ёниб кетди, бир ҳайдовчи вафот этди

Қорақалпоғистон Республикаси Қўнғирот тумани «Жаслиқ» посёлка фуқаролар йиғини ҳудудидан ўтувчи А-380 автомобиль йўлида содир бўлган йўл-транспорт ҳодисаси оқибатида иккита юк машинаси ёниб кетди ва бир ҳайдовчи вафот этди. Бу ҳақда Тергов департаменти хабар берди.

Маълумотларга кўра, 23 июль куни соат 18:05 да 26 ёшли Ш.С. ўз бошқарувидаги DAF FT XF 105 русумли юк автомашинада А-380 автомобиль йўлининг 1009—1010 километрлари оралиғида ҳаракатланиб кетаётиб бошқарувни йўқотган. Оқибатда DAF ушбу йўлнинг қарама-қарши томонига ўтиб кетиб, украиналик 32 ёшли И.С.нинг бошқарувидаги Volvo юк автомашинасининг чап ён томонига бориб урилган.

Шундан сўнг, у ушбу юк автомашинадан кейин ҳаракатланиб келаётган Украина фуқароси 29 ёшли Ю.К.нинг бошқарувида бўлган яна бир Volvo русумли юк автомашинасининг олди томонига урилиб, йўл-транспорт ҳодисаси содир этган.

Натижада DAF FT XF 105 русумли юк автомашинаси ҳайдовчиси Ш.С. ҳодиса жойида вафот этган.

Шунингдек, ЙТҲ оқибатида DAF FT XF 105 ҳамда Ю.К. бошқарувидаги Volvo юк автомашиналарида ёнғин келиб чиқиб, ҳар иккала юк автомашинаси бутунлай ёниб кетган.

Мазкур ҳолат юзасидан Қўнғирот тумани ИИБ ҳузуридаги Тергов бўлинмаси томонидан Жиноят кодексининг 266-моддаси 2-қисми (Одам ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган, ҳозирда дастлабки тергов ҳаракатлари олиб борилмоқда.

Аввалроқ Қорақалпоғистонда туман ИИБ бошлиғи хизмат машинасида пиёдани уриб юбориши оқибатида 23 ёшли йигит ҳалок бўлгани тўғрисида хабар берилганди.