Jasliqda sodir bo‘lgan YTH oqibatida Volvo va DAF yuk mashinalari yonib ketdi, bir haydovchi vafot etdi

Qoraqalpog‘iston Respublikasi Qo‘ng‘irot tumani “Jasliq” posyolka fuqarolar yig‘ini hududidan o‘tuvchi A-380 avtomobil yo‘lida sodir bo‘lgan yo‘l-transport hodisasi oqibatida ikkita yuk mashinasi yonib ketdi va bir haydovchi vafot etdi. Bu haqda Tergov departamenti xabar berdi.

Ma’lumotlarga ko‘ra, 23-iyul kuni soat 18:05 da 26 yoshli Sh.S. o‘z boshqaruvidagi DAF FT XF 105 rusumli yuk avtomashinada A-380 avtomobil yo‘lining 1009—1010 kilometrlari oralig‘ida harakatlanib ketayotib boshqaruvni yo‘qotgan. Oqibatda DAF ushbu yo‘lning qarama-qarshi tomoniga o‘tib ketib, ukrainalik 32 yoshli I.S.ning boshqaruvidagi Volvo yuk avtomashinasining chap yon tomoniga borib urilgan.

Shundan so‘ng, u ushbu yuk avtomashinadan keyin harakatlanib kelayotgan Ukraina fuqarosi 29 yoshli Yu.K.ning boshqaruvida bo‘lgan yana bir Volvo rusumli yuk avtomashinasining oldi tomoniga urilib, yo‘l-transport hodisasi sodir etgan.

Natijada DAF FT XF 105 rusumli yuk avtomashinasi haydovchisi Sh.S. hodisa joyida vafot etgan.

Shuningdek, YTH oqibatida DAF FT XF 105 hamda Yu.K. boshqaruvidagi Volvo yuk avtomashinalarida yong‘in kelib chiqib, har ikkala yuk avtomashinasi butunlay yonib ketgan.

Mazkur holat yuzasidan Qo‘ng‘irot tumani IIB huzuridagi Tergov bo‘linmasi tomonidan Jinoyat kodeksining 266-moddasi 2-qismi (Odam o‘limiga olib kelgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan, hozirda dastlabki tergov harakatlari olib borilmoqda.

Avvalroq Qoraqalpog‘istonda tuman IIB boshlig‘i xizmat mashinasida piyodani urib yuborishi oqibatida 23 yoshli yigit halok bo‘lgani to‘g‘risida xabar berilgandi.