Наманганда автотранспорт ҳаракатланиши чекланган куни рўй берган Cobalt ва Damas машиналари тўқнашув оқибатида бир киши ҳалок бўлди. Бу ҳақда «Дарё»га Наманган вилоят ИИБ ахборот хизмати маълум қилди.
Наманган шаҳрида яшовчи фуқаро 2020 йил 26 июль — якшанба куни ўзига тегишли бўлган махсус стикерга эга Cobalt автомашинасини бошқариб кетаётиб, ҳаракат хавфсизлигини таъминлай олмай, қарама-қарши томондан келаётган Damas русумли тез ёрдам машинасига бориб урилди.
ЙТҲ туфайли Cobalt ҳайдовчисининг кўкрак қафаси юмшоқ тўқимаси лат еган. Damas ҳайдовчиси эса оғир қўшма шикаст, бош мия ёпиқ шикасти, ўнг оёқ сон суяги ёпиқ синиши ташхиси билан шифохонага ётқизилган.
Тез ёрдам машинасида йўловчи сифатида кетаётган фуқаро оғир тан жароҳати олиб, кўрсатилган ёрдамга қарамай шифохонада вафот этди.
Ҳозирда ҳолат юзасидан суриштирув ишлари олиб борилмоқда.
Маълумот учун, Наманган вилоятида 2020 йилнинг 6 ойи мобайнида 248 та йўл-транспорт ҳодисаси содир бўлган. Оқибатда 67 киши ҳалок бўлди, 228 нафар фуқаро турли даражада тан жароҳатлари олди.
Изоҳ (0)