Сардоба сув омбори қурилишининг 2-босқичи давлат комиссияси томонидан қабул қилинмаган, шунга қарамай у сув билан тўлиқ тўлдирилган

Сардоба сув омбори қурилишининг 2-босқичи давлат комиссияси томонидан қабул қилинмаган бўлган. Бу ҳақда Ўзбекистон Бош прокуратураси 27 июлдаги баёнотида маълум қилди.

1 май куни Сардоба сув омбори тўғони ўпирилган, бунинг оқибатида Сирдарё вилоятининг Сардоба, Оқолтин ва Мирзаобод туманлари, шунингдек, Қозоғистоннинг Туркистон вилояти Мақтаарал тумани ҳудудлари сув остида қолган, минглаб аҳоли хавфсиз ҳудудларга кўчирилган эди.

Маълум қилишларича, ҳодиса юзасидан олиб борилган тергов ҳаракатлари давомида қуйидаги асосий тахминлар кўриб чиқилган: лойиҳалашдаги хатоликлар, қурилиш жараёнида меъёрларга риоя қилмаслик, эксплуатация жараёнидаги хатоликлар ва табиий офат. Якунда табиий офат тахмини чиқариб ташланган.

«Экспертиза сув омборини лойиҳалаш, қуриш ҳамда эксплуатация қилиш жараёнидаги қайд этилган хато ва камчиликлар, сув омбори қурилиши 2-босқичи давлат комиссияси томонидан қабул қилинмаган бўлса-да, тўла ҳажмда сув тўпланганлиги якка тартибда ёки уларнинг мажмуйи тўғон ўпирилишига сабаб бўлганлиги ҳақида хулосага келган», — дейилади Бош прокуратура ахборотида.

Қўшимча қилинишича, ҳодиса бўйича қўзғатилган жиноят иши доирасида тўққиз киши қамоққа олинган, қамоққа олинганлар орасида «Ўзтемир йўлқурилишмонтаж» УК, «Резаксой сув қурилиш» УК, «Тўпаланг Шеробод» ШК, Сув хўжалиги вазирлиги ходимлари борлиги таъкидланмоқда. Дастлабки тергов муддати яна беш ойга узайтирилган.

Маълумот учун, Сардоба сув омборининг умумий сиғими 974 миллион куб метр (фойдаланиш ҳажми — 922 миллион куб метр)ни ташкил қилади. Фалокат юз берганидан сўнг давлат телевидениеси томонидан ҳодиса арафасида кузатилган кучли ёмғир ва шамол тўғоннинг ўпирилишига сабаб бўлган бўлиши мумкинлиги айтилган эди.

Шунингдек, Ўзбекистон сув хўжалиги вазири ўринбосари Воҳиджон Аҳмаджонов ўшанда бу тахминни тасдиқлаб, фалокат «кучли ёмғир ва шамол натижасида вужудга келган тўлқин лойиҳавий режадан ортиқ бўлиши натижасида келиб чиққан»ини, бу техноген ҳодиса эканини таъкидлаган эди. Бироқ метеорологлар 1 майга ўтар кечаси сув омбор ҳудудида кучли ёғингарчилик ҳам, кучли шамол ҳам бўлмаганини маълум қилган эди.