Олий Мажлис Сенати раиси Танзила Норбоева бошчилигидаги «Юксалиш» умуммиллий ҳаракати таъсисчиларининг 27 июль кундаги йиғилишида Олий Мажлис Қонунчилик палатаси депутатлари орасидан янги раис сайланди. Бу ҳақда ҳаракат ижтимоий тармоқдаги саҳифасида маълум қилди.
Унга кўра, парламент қуйи палатасининг Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси аъзоси Бобур Бекмуродов ҳаракат раиси бўлди.
Маълумот учун, Бобур Бекмуродов 1985 йил 5 январда Қашқадарё вилоятининг Яккабоғ туманида туғилган. У Ўзбекистон давлат жаҳон тиллари университети, Тошкент молия институтини тамомлаган. 2005—2006 йилларда АҚШнинг Ўзбекистондаги «Partnership for Academic development» («Академик ривожланиш бўйича ҳамкорлик») дастури тингловчиси, 2018 йилда «The John Smith Trust» (Буюк Британия) менежмент дастури тингловчиси бўлган.
Ҳаракатнинг аввалги раиси Акмал Бурҳонов Коррупцияга қарши курашиш агентлиги директори лавозимига тайинланган эди.
Мавзуга доир:
Изоҳ (0)