“Sardoba falokatining barcha aybdorlari, kim bo‘lishidan qat’i nazar, javob beradi” — Shavkat Mirziyoyev

Sardobadagi falokat bo‘yicha barcha aybdorlar, kim bo‘lishi va egallab turgan lavozimidan qat’i nazar, qonun oldida javob beradi. Bu haqda Prezident Shavkat Mirziyoyev 5-may, seshanba kuni bo‘lib o‘tgan videoselektor yig‘ilishida ma’lum qildi.

“Xalqimiz bir narsadan ko‘ngli to‘q bo‘lishi kerak, hech qanday ortiqcha gap-so‘zlarga va mish-mishlarga o‘rin bo‘lmasligi lozim.

Mening topshirig‘imga ko‘ra, huquqni muhofaza qiluvchi organlar tomonidan suv toshqini bilan bog‘liq voqea yuzasidan obyektiv, xolis va keng qamrovli tergov harakatlari boshlangan.

Xalqimizni ishontirib aytaman — tergov yakunlari bo‘yicha barcha aybdorlar, kim bo‘lishi va egallab turgan lavozimidan qat’i nazar, qonun oldida javob beradi”, — dedi Prezident.

Prezidentning ma’lum qilishicha, Sardobadagi falokatdan so‘ng to‘rt kishi halok bo‘lgan, bir kishi bedarak yo‘qolgan. Qayd etish joiz, Shavkat Mirziyoyev 5-may kuni bo‘lib videoselektor yig‘ilishida O‘zbekiston xalqiga minnatdorlik bildirdi.

Avvalroq Sardoba falokati yuzasidan jinoyat ishi qo‘zg‘atilgan, tergov harakatlari Davlat xavfsizlik xizmati tomonidan olib borilayotgani haqida xabar berilgan edi. Prezident ofatdan jabrlangan mahalla aholisi bilan muloqotda voqea yuzasidan huquqni muhofaza qiluvchi organlar o‘z xulosalarini berishini ta’kidlagan edi.