Бухоро ҳокимлиги кислород концентраторлари Мedtexno trade хусусий корхонасидан харид қилинганини маълум қилди

Бухоро вилоятида коронавирус инфекциясига чалинган беморларни даволаш учун ҳар бирининг нархи 12 миллион сўм бўлган 50 дона кислород концентраторлари харид қилингани ҳақидаги хабар ижтимоий тармоқларда кенг муҳокамага сабаб бўлди.

Мавзу кенг муҳокамаларга сабаб бўлишига қарамай, ҳокимлик кислород концентраторларининг нархи ва уларнинг айнан қайси таъминотчидан харид қилинганини тўлиқ очиқламади. «Дарё» мухбири мазкур савол билан яна масъулларни безовта қилди.

Бухоро ҳокими ўринбосари Мирали Ҳамроевга кўра, шу кунга қадар вилоятдаги мавжуд шифохоналардан фақатгина Республика шошилинч тез ёрдам илмий маркази вилоят филиалидагина кислород станцияси мавжуд бўлган. Беморлар сони ортиб, уларнинг аҳволи оғирлашиши кислород концентраторларини харид қилиш ҳақида тезкор қарор қабул қилинишига сабаб бўлган.

«Вилоятда коронавирусга чалинганлар сони ошиб, мураккаб вазият юзага келди. Бир ҳафта-ўн кун олдин вилоят касалхоналарида беморларни оғир аҳволдан олиб чиқишга мослаштирилган замонавий тиббиёт воситалари тугул, ҳатто касалларни шифохоналарга қабул қилиш учун етарлича шароитлар ҳам йўқ эди. Фурсат кутиб турмайди. Бундай вазиятда ҳар бир кун эмас, ҳар бир соат, ҳар бир дақиқа ғанимат. Шу боис донаси 12 миллион сўм бўлган мобил кислород аппаратларини харид қилдик», — деди Мирали Ҳамроев.

Вилоят молия бошқармаси бошлиғи Бахтиёр Одиловнинг «Дарё»га маълум қилишича, тиббий жиҳозлар маҳаллий бюджет маблағлари ҳисобидан харид қилинмаган, лекин маблағлар мақсадсиз ҳам сарфланмаган.

«Бухорога тиббий мосламалар Мedtexno trade хусусий корхонаси томонидан етказиб берилган. Бухоро харид қилган кислород концентраторлари нархи республикамиздаги электрон савдо дўконлари, шу жумладан, Olx.uz сайти ва бошқа сайтлар орқали июль ойи давомида 14,0-20,1 миллион сўмгача таклиф этилганди. Айрим таъминотчилар томонидан эса 1300-1900 доллар миқдорида таклиф этилди. Айтиш жоизки, бу тиббий воситалар нархида ҳам тафовутлар мавжуд. Alibaba электрон савдо сайтидаги товарлар нархлари ва шартлари чет эл логистика компаниялари, ишлаб чиқарувчи ва савдо корхоналари томонидан белгиланади. Dynmed компаниясининг кислород концентраторлари Alibaba’да 320 доллардан, агар 100 тадан ортиқ олинса, 220 доллардан сотилаётгани важи ортида маҳсулотни етказиб беришда транспорт хизмати харажатлари, ҳужжатларни расмийлаштириш ва божхона харажатлари инобатга олинмаган», — деди Бахтиёр Одилов.

Унинг мутахассислар кузатувига таяниб, «Дарё»га билдиришича, D02-8-АМ русумли концентраторлари беморни бир дақиқада 8 литргача намланган кислород билан таъминласа, интернет сайтларида эълон қилинган аппаратлар шу вақтда 5 литргача намланган кислород билан таъминлаш қувватига эга. Бундан ташқари, харид қилинган аппаратлар оғир аҳволдаги беморларга кислород билан таъминлаш учун мўлжалланган бўлса, интернет сайтларида эълон қилинган аппарат ўрта аҳволдаги, яъни нафас олиши ўрта оғирликдаги беморларга кислород етказиб бериш учун мўлжалланган.

«Мазкур ҳолатга оммавий ахборот воситалари ходимлари, журналист ва блогерларнинг бефарқ эмаслиги бизни қувонтирди. Бухоро ҳокимлиги томонидан вилоятдаги эпидемиологик барқарорликни таъминлаш, фуқароларга даволаниш учун қулай шарт-шароитлар яратиш мақсадида кўплаб ишлар амалга оширилган. Бу ишлар ортида хизмат вазифасини суиистеъмол қилиш, бировнинг оғир аҳволидан фойдаланиб, шахсий манфаат кўриш, бугунги давлат сиёсатига қарши бориш ҳолати йўқ», — деди Мирали Ҳамроев.

Мазкур ҳолатга масъул ташкилотлар ҳуқуқий баҳо беради, албатта. «Дарё» эса воқеалар ривожини кузатишда давом этади.