Buxoro hokimligi kislorod konsentratorlari Medtexno trade xususiy korxonasidan xarid qilinganini ma’lum qildi

Buxoro viloyatida koronavirus infeksiyasiga chalingan bemorlarni davolash uchun har birining narxi 12 million so‘m bo‘lgan 50 dona kislorod konsentratorlari xarid qilingani haqidagi xabar ijtimoiy tarmoqlarda keng muhokamaga sabab bo‘ldi.

Mavzu keng muhokamalarga sabab bo‘lishiga qaramay, hokimlik kislorod konsentratorlarining narxi va ularning aynan qaysi ta’minotchidan xarid qilinganini to‘liq ochiqlamadi. “Daryo” muxbiri mazkur savol bilan yana mas’ullarni bezovta qildi.

Buxoro hokimi o‘rinbosari Mirali Hamroyevga ko‘ra, shu kunga qadar viloyatdagi mavjud shifoxonalardan faqatgina Respublika shoshilinch tez yordam ilmiy markazi viloyat filialidagina kislorod stansiyasi mavjud bo‘lgan. Bemorlar soni ortib, ularning ahvoli og‘irlashishi kislorod konsentratorlarini xarid qilish haqida tezkor qaror qabul qilinishiga sabab bo‘lgan.

“Viloyatda koronavirusga chalinganlar soni oshib, murakkab vaziyat yuzaga keldi. Bir hafta-o‘n kun oldin viloyat kasalxonalarida bemorlarni og‘ir ahvoldan olib chiqishga moslashtirilgan zamonaviy tibbiyot vositalari tugul, hatto kasallarni shifoxonalarga qabul qilish uchun yetarlicha sharoitlar ham yo‘q edi. Fursat kutib turmaydi. Bunday vaziyatda har bir kun emas, har bir soat, har bir daqiqa g‘animat. Shu bois donasi 12 million so‘m bo‘lgan mobil kislorod apparatlarini xarid qildik”, — dedi Mirali Hamroyev.

Viloyat moliya boshqarmasi boshlig‘i Baxtiyor Odilovning “Daryo”ga ma’lum qilishicha, tibbiy jihozlar mahalliy budjet mablag‘lari hisobidan xarid qilinmagan, lekin mablag‘lar maqsadsiz ham sarflanmagan.

“Buxoroga tibbiy moslamalar Medtexno trade xususiy korxonasi tomonidan yetkazib berilgan. Buxoro xarid qilgan kislorod konsentratorlari narxi respublikamizdagi elektron savdo do‘konlari, shu jumladan, Olx.uz sayti va boshqa saytlar orqali iyul oyi davomida 14,0-20,1 million so‘mgacha taklif etilgandi. Ayrim ta’minotchilar tomonidan esa 1300-1900 dollar miqdorida taklif etildi. Aytish joizki, bu tibbiy vositalar narxida ham tafovutlar mavjud. Alibaba elektron savdo saytidagi tovarlar narxlari va shartlari chet el logistika kompaniyalari, ishlab chiqaruvchi va savdo korxonalari tomonidan belgilanadi. Dynmed kompaniyasining kislorod konsentratorlari Alibaba’da 320 dollardan, agar 100 tadan ortiq olinsa, 220 dollardan sotilayotgani vaji ortida mahsulotni yetkazib berishda transport xizmati xarajatlari, hujjatlarni rasmiylashtirish va bojxona xarajatlari inobatga olinmagan”, — dedi Baxtiyor Odilov.

Uning mutaxassislar kuzatuviga tayanib, “Daryo”ga bildirishicha, D02-8-AM rusumli konsentratorlari bemorni bir daqiqada 8 litrgacha namlangan kislorod bilan ta’minlasa, internet saytlarida e’lon qilingan apparatlar shu vaqtda 5 litrgacha namlangan kislorod bilan ta’minlash quvvatiga ega. Bundan tashqari, xarid qilingan apparatlar og‘ir ahvoldagi bemorlarga kislorod bilan ta’minlash uchun mo‘ljallangan bo‘lsa, internet saytlarida e’lon qilingan apparat o‘rta ahvoldagi, ya’ni nafas olishi o‘rta og‘irlikdagi bemorlarga kislorod yetkazib berish uchun mo‘ljallangan.

“Mazkur holatga ommaviy axborot vositalari xodimlari, jurnalist va blogerlarning befarq emasligi bizni quvontirdi. Buxoro hokimligi tomonidan viloyatdagi epidemiologik barqarorlikni ta’minlash, fuqarolarga davolanish uchun qulay shart-sharoitlar yaratish maqsadida ko‘plab ishlar amalga oshirilgan. Bu ishlar ortida xizmat vazifasini suiiste’mol qilish, birovning og‘ir ahvolidan foydalanib, shaxsiy manfaat ko‘rish, bugungi davlat siyosatiga qarshi borish holati yo‘q”, — dedi Mirali Hamroyev.

Mazkur holatga mas’ul tashkilotlar huquqiy baho beradi, albatta. “Daryo” esa voqealar rivojini kuzatishda davom etadi.