Қашқадарё вилоятида коронавирусга қарши курашаётган 101 нафар тиббиёт ходимига 1 миллиард 660 миллион сўм тўлаб берилган. Бу ҳақда Зоир Мирзаев иштирокидаги брифингда маълум қилинди, дея хабар берди «Дарё» мухбири.
«Ўз касбига садоқатли бўлган, коронавирусни юқтирган беморларни даволашда қатнашаётган 34 нафар шифокорга 25 миллион сўмдан 850 миллион сўм, 36 нафар ўрта тиббиёт ходимига 15 миллион сўмдан 540 миллион сўм, 23 нафар кичик тиббиёт ходимига 10 миллион сўмдан 230 миллион сўм, 8 нафар бошқа хизмат кўрсатган ходимга 5 миллион сўмдан 40 миллион сўм, жами 1 миллиард 660 миллион сўм тўлаб берилган», — деди вилоят раҳбари Зоир Мирзаев.
Таъкидланишича, вирус юқтирган беморларни даволашда хизмат кўрсатаётган тиббиёт ходимларининг 14 кунлик иш ҳаққига 6 фоиз устама ҳисобланиб, уларга жами 10 миллиард 352 миллион сўм тўлаб берилган.
Зоир Мирзаев брифинг давомида корхона ва ташкилот раҳбарларига мурожаат қилиб, ходимининг бирор бир яқини коронавирусга чалинган бўлса ҳам моддий томонлама қўллаб-қувватлашга чақирди.
Қўшимча қилинишича, Президент фармони билан вилоятдаги 12 нафар тиббиёт ходими, 1 нафар ИИБ ва 1 нафар Миллий гвардия ходими юксак мукофотга муносиб кўрилган.
Эслатиб ўтамиз, мамлакатда коронавирус инфекциясидан зарарланган беморлар билан мулоқотга киришадиган, зарарланган беморлар жойлаштирилган объектларда ҳамда коронавирус инфекциясини аниқлаш лабораторияларида фаолият олиб бораётган тиббиёт ходимларига ҳар 14 кунлик фаолият даври учун махсус қўшимча рағбатлантириш тўлови белгиланган. Чунингдек, беморлар билан ишлаш давомида коронавирус инфекциясини юқтириб олган тиббиёт, санитария-эпидемиология хизмати ва бошқа ходимларга 100 миллион сўмдан тўланади.
Коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.
Изоҳ (0)