Андижон вилоят давлат солиқ бошқармасига янги раҳбар этиб Отабек Турсунов тайинланди. Бу ҳақда Давлат солиқ қўмитасининг ахборот хизмати маълум қилди.
Отабек Турсунов айни кунга қадар бошқарма бошлиғининг биринчи ўринбосари вазифасида ишлаб келган. У 1984 йилда Андижон вилоятида туғилган, меҳнат фаолиятини 2006 йил вилоят давлат солиқ бошқармасида фуқароларни рўйхатга олиш бўйича навбатчи лавозимидан бошлаган.
«Дарё» мухбирининг қўшимча қилишича, бошқарманинг собиқ бошлиғи Зуфарбек Йўлдошев 2020 йил 6 июль куни ўтказилган ҳокимлик соатида Шуҳрат Абдураҳмоновдан «масъулиятсиз раҳбар» нишонини олган. Йўлдошев солиқ идораларининг вилоятда ноқонуний кўча савдосига аҳамият бермаётгани ва сектор ишида солиқчиларнинг сусткашликка йўл қўяётгани ортидан бу «эътироф»га лойиқ кўрилган. Қизиғи, шундан кейин ҳам солиқ идоралари фаолиятида жиддий ўзгаришлар кузатилмаган.
Қайд этиш лозимки, 2020 йилнинг июль ойида Шуҳрат Абдураҳмонов таклифи билан Андижонда раҳбарларга ишидаги натижаларига қараб, ҳар ҳафта «масъулиятли раҳбар» ёки «масъулиятсиз раҳбар» кўкрак нишони берилишига келишиб олинган.
«Дарё» мухбирига кўра, вилоят солиқчилари бошлиғи биринчи ҳафтадаги огоҳлантиришдан сўнг икки ҳафта кетма-кет «масъулиятсиз раҳбар» нишонига муносиб кўрилган. Шундан сўнг солиқчилар бошлиғи масаласи кўриб чиқилиши қайд этилган.
Изоҳ (0)