Икки заправка орасида тиббий клиника қуришга рухсат берган Қарши шаҳар ҳокими Нормўмин Холбоев судда тадбиркорга ютқазди. Бу ҳақда суд ишида қатнашган «Дарё» мухбири хабар берди.
Қарши шаҳар маъмурий суди 2020 йил 24 июль куни шаҳар ҳокими Нормўмин Холбоевнинг 2020 йил 3 июндаги қарорининг биринчи банди — Artro-Med хусусий корхонасига 40 сотих ер ажратиб бериш ҳақидаги қисмини ҳақиқий эмас, деб топди.
Судьянинг таъкидлашича, Нормўмин Холбоевнинг собиқ ҳоким Жамшид Фозилов томонидан 2019 йил 4 апрель куни имзоланган ва суд томонидан бекор қилинган қарорини қонун талабларига мувофиқлаштиришининг ўзи қонунга зид ҳаракат ҳисобланади.
«Ҳоким Нормўмин Холбоев собиқ ҳокимнинг суд томонидан ҳақиқий эмас, деб топилган қарорини қонунга мувофиқлаштирган. Ҳокимнинг мана шу ҳаракатининг ўзи қонунга хилоф», — деди жараёнга раислик қилувчи судья.
Судьянинг фикрича, шаҳар ҳокимлигида ушбу қарорни тайёрлаган мутахассислар ушбу ҳаракатнинг қонунга зидлигини англаб етмаган.
Қарши шаҳар маъмурий суди 2020 йил 24 июлдаги қарори билан тадбиркор Бахтиёр Раҳимовнинг талабини қондирди.
Суд қарорига кўра, эндиликда Бахтиёр Раҳимов раҳбарлигидаги ёнилғи қуйиш шохобчасидан янги қурилаётган клиника биносигача эни 20 метр, бўйи 78 метр бўлган майдон қолдирилиб, муҳофаза майдони сифатида девор билан ўралади.
Изоҳ (0)