Туркманистон фуқаролари ичак инфекциясининг олдини олиш учун қўлларини ювиш ва ниқоб тақишга чақирилди, деб хабар бермоқда Asia-Plus. Бу ҳақда мамлакат ҳукуматининг «Нейтралний Туркменистан» газетасининг 23-сонида қайд этилди.
Мақола бошида муаллиф, Она ва бола саломатлиги илмий-клиник маркази директори ўринбосари вазифасини бажарувчи Гулорам Жўраева «бактериал ва вирусли табиатдаги турли хил микроорганизмлар» хавфидан огоҳлантирган.
Қўлларни ювишдан ташқари, у овқат тайёрлаш ва овқатланишнинг кўплаб бошқа санитария-гигиеник қоидаларини — сабзавот ва меваларни ювиш, ошхонани тоза сақлаш ва маҳсулотларни тўғри сақлашни санаб ўтган.
Шундан сўнг у озиқ-овқат нафақат микроорганизмлар, балки нитратлар, оғир металлар ва пестицидлар билан ҳам зарарланган бўлиши мумкинлигидан огоҳлантирган. Охирда эса кутилмаганда ўқувчиларни тиббий ниқоблар тақишга ва масофа сақлашга чақирган, лекин бунинг ичак инфекциялари билан қандай боғлиқлиги борлигини тушунтирмаган.
Эслатиб ўтамиз, Туркманистонда 13 июлдан бошлаб ниқоб тақиш мажбурий қилиб белгиланган, аммо ҳукумат мамлакатда коронавирус борлигини ҳали ҳам рад этиб келмоқда. Ниқоб тақиш мамлакатда жануби-шарқ, шимоли-шарқ ва шимолдан кириб келган чанг миқдори ошиб кетгани сабабли ундан ҳимояланиш учун мажбурий деб белгиланган. Шундан сўнг тиббий ниқобларга талаб ортди, уларнинг нархи ҳафта давомида 14 бараварга ошди.
Мамлакатда 6 июлдан 15 июлгача Жаҳон соғлиқни сақлаш ташкилоти миссияси текширув ўтказди. Ташриф якунларига бағишланган брифингда миссия раҳбари Кетрин Смолвуд мамлакат Соғлиқни сақлаш вазирлигига таянган ҳолда Туркманистонда COVID-19 инфекциясига чалиниш ҳолати борлигини тасдиқламаган.
Изоҳ (0)