Ҳиндистонда коронавирусга чалинганлар сони бир сутка ичида камида 49,3 минг кишига кўпайди, касалланганларнинг умумий сони 1 287 945 кишига етди. Бу ҳақда Ҳиндистон Соғлиқни сақлаш ва оилавий фаровонлик вазирлиги хабар бермоқда.
Сўнгги маълумотларга кўра, Ҳиндистонда ҳозиргача 817 208 киши (бир суткада 64 159 киши) касалликдан соғайган, 30 601 киши (бир суткада 740 киши) вафот этган. 440 135 киши эса даволанишни давом эттирмоқда.
Коронавирус эпидемиясидан энг кўп мамлакат марказидаги Маҳараштра штати жабр кўрган — у ерда ҳозиргача 347 502 киши касалланган. Сўнгги бир сутка ичида энг кўп касалланиш ҳолатлари Маҳараштра (9 895 киши), Андҳра-Прадеш (7 998 киши), Тамилнад (6 472 киши), Карнатака (5030 киши) ва Уттар-Прадеш (2 516 киши) штатларида қайд этилган.
Бразилияда коронавирусга чалинганлар сони 59 961 кишига кўпайиб, 2 287 475 ишига етган. Мамлакат Соғлиқни сақлаш вазирлиги маълумотларига кўра, ҳозиргача 1 570 237 киши касалликдан соғайиб улгурган.
Шу билан бирга, сўнгги бир сутка ичида Бразилияда 1 311 киши COVID-19 асоратларидан вафот этган — мамлакатда коронавирус қурбонлари сони 84 082 нафарга етган.
Қайд этиш жоиз, 22 июль куни Бразилияда коронавирусга чалиниш ҳолатлари сони бўйича кунлик антирекорд янгиланган эди — шу куни мамлакатда салкам 68 минг кишида COVID-19 тасдиқланган эди.
Маълумот учун, Бразилия коронавирус билан касалланиш ҳолатлари сони бўйича жаҳонда иккинчи, Ҳиндистон эса учинчи ўринда турибди (биринчи ўринда — АҚШ). Жаҳон соғлиқни сақлаш ташкилоти маълумотларига кўра, коронавирусга чалинганлар сони дунё бўйича 15 миллиондан ошиб кетган (биргина АҚШнинг ўзида 4 миллиондан ортиқ одам касалланган), 650 мингдан ортиқ одам эса инфекция асоратларидан вафот этган.
Изоҳ (0)